下個月十七號就二十歲嘅「嵐」成員二宮和也，九六年加入尊尼事務所時只係做Johnny'sJr.，但已經迷死唔少女fans，前年二宮俾《Friday》偷拍到夜嘛嘛同女星椎名法子拍拖，我羅拉知道有唔少少女fans傷心欲絕。噚日出版嘅爆料雜誌《BUBKA》，就喺封面大字標題「椎囗法子、『嵐』二宮囗也驚愕Kiss寫真」，刊登一對男女嘅親密照片，大家一睇就知當中所指係邊兩位啦！
雜誌《BUBKA》嗰次刊出奧菜惠同押尾學嬉春照片，因為怕遭到二人控告損害名譽，所以用咗奧■惠同押■學嚟報道件事，噚日出版嘅七月號，就刊出二宮同佢嘅緋聞女友椎名法子私人親密合照，亦同樣唔敢標佢兩個嘅全名。
報道指二宮同拍拖近兩年嘅椎名法子關係非常親密，一向喺fans心目中係鄰家乖乖仔嘅二宮，同法子玩得好癲吓，佢哋攞起個有攝影功能嘅手機，就玩起自拍，法子重影到除晒上衫，對住二宮半裸合照，大膽得拍得住奧菜惠同押尾學嗰輯嬉春照，呢輯相真係令二宮下季喺新劇扮鹹濕仔更加有說服力！