卿姐劉慧卿同曾鈺成肩並肩拍掌、楊森同田少田北俊齊聲高歌，如果唔係因為沙士，呢啲「奇景」都唔會出現。
噚日「心連心全城抗炎大行動」為慶祝疫情稍為緩和，特登將播到街知巷聞嘅抗炎歌《香港心》稍作改動，成為新嘅抗炎主題曲《香港再起飛》，召集人王䓪鳴請來政商界同多位明星大合唱。
立法會七個政黨黨魁代表齊集，包括民主黨楊森、自由黨田北俊、民建聯曾鈺成、前綫劉慧卿、民協馮檢基、港進聯劉漢銓、新世紀論壇馬逢國。
眾人致辭時，曾鈺成話咪以為政黨成日爭拗，其實大家多數都好團結，楊森就話港人打不死，不過最多掌聲嘅竟然係田少，佢話想經濟好就先要身體健康，要健康就先要環境衞生、同沙士拜拜，所以「一定要支持煲呔曾！」
劉漢銓可能見到田少「挺曾」挺得咁過癮，佢又學人即場「挺董」，叫大家支持特首嘅重振經濟措施，點知惹來全場哄笑，不過大家跟住亦畀面拍手。
八方重留意到一樣嘢，班政、商界名人噚日唱歌時，比身後班明星歌星重投入，其中前中央政策組首席顧問鄭維健，更表情多多鬼死咁肉緊，睇嚟佢童心未泯，兼且平時唱慣K。
傳真︰2623-9278
電郵︰