長洲有條小長城，城上有個不願上鏡的儍老頭，叫二儍。
我手寫我心，靈感到，二儍就在石頭上「塗鴉」：「我係石癡，長洲名勝三石朝陽，好靚，所以我題字，見到嚿石似乜，我就話嚿石係乜乜石，小長城個名，都係我老作，所有長洲人都知。」
兩模特兒不知，但亦樂意敷衍這個儍老頭，跟着他，遊「城」玩「石」。
記者：陳漢榮攝影：林栢鈞
模特兒：Mon、Cidy（KOne）
落船，二女先到長洲書店買份地圖，興高采烈尋三石朝陽所在。
十分鐘後，身處小長城起點的二女已氣喘如牛，Cidy想打退堂鼓：「條路好長喎，都唔知要行幾耐。」Mon亦有同感：「行幾個鐘咪連命都無？」對望，轉身，就想回路走。
「後生女，行幾步路就話腳軟？」腳踏無聲，一老頭如鬼魅般出現，嚇了二女一跳，Cidy不忿被揶揄：「阿伯你邊位？」老頭說：「我叫二儍，係小長城嘅免費導遊，我帶你哋睇三石朝陽，來回唔使一個鐘，怕唔怕先？」Mon亦氣上心頭：「怕乜？」「唔怕腳軟咩？」「怕你我哋就叫三儍、四儍……」
「三石朝陽者，長洲奇景也，包括……」二儍話未完，Mon已搶着說：「花瓶石、叮噹石同人頭石吖嘛！」Cidy接口：「三石向東，所以叫三石朝陽，我哋溫定書先入嚟蒲。」二儍點頭，以示稱讚：「咁點睇花瓶石先最靚？」二女耍手擰頭，「睇吓石頭上面寫咗啲乜？」
Cidy細讀：「石中藏玄機，瓶內有天地，曲徑通幽處，天地造物奇。」Mon即問：「二儍伯伯寫㗎？幾好文采噃。」二儍很受落二女的褒獎：「嗱，呢個位睇就最似花瓶嘞，重可玩捐石窿㖭。」「望落好似好危險。」「我六十幾歲人，日捐夜捐都無事，後生女反而喊驚？」抵不過嘲諷，也嫌身手笨絕，但玩畢後，Mon也不禁說：「好過癮，影相留念先。」
告別花瓶石，伴着喘氣聲，行行重行行。
未幾，見叮噹石，二儍說：「石呈三角形，中間有石罉，大風吹入石罉，就會呼呼呼聲咁響，所以咪叫叮噹石囉。」叮噹石可達，但人頭石卻只可遠觀，Mon大呼形神俱似：「似到吖！成個紮髻女人咁款，醜就醜樣啲，不過眼耳口鼻齊！」「三石朝陽就睇完嘞，再睇我命名嘅奇石啦。」
老鼠石、卧貓石、駱駝石，十多顆石頭，俱有二儍的命名題字，Mon不禁問：「你真係幾得閒喎，擒高擒低寫字，唔怕跌親咩？」二儍認真答：「跌跛過啦，咪為咗呢嚿仙鶴石囉。」二女視線循二儍所指，一望，差點笑破肚皮，「唔似咩？」「哈哈，梗唔似啦！」「真係唔似？」「似你就唔使加隻眼喇……」
交通
新渡輪於中環及尖沙嘴碼頭均有航班往長洲
收費：成人$21 小童$10.5 （周一至六）
成人$31 小童$15.5（周日及假日）
查詢熱線：21318181
長洲食肆多，但論平，非杏花邨酒樓莫屬，$99包BB鴿2隻或游水海鮮、例湯或粟米魚肚羹、任擇2款小菜、精美甜品，足4位用，均除每人$30有找，重想點？
店名：長洲杏花邨酒樓（29818382）
地址：長洲大新海傍街95至97號
營業時間：5:00am至1:00am