大市窄幅波動，恒指高低幅度唔夠100點，埋單跌21點，期指高水68點。後市展望都係反反覆覆，炒家搵股仔炒，藍籌個別發展。
電盈（008）呢幾日較弱，收5.10元，連續兩日每日都係向下移5仙。5元邊邊，應該守得住。吼住喺呢個位執啲Call輪博吓，冇乜得揀，得隻9662，9月底夠鐘，現價5.1仙，溢價20.7%，槓桿率20倍，隻輪溢價的確係高啲，不過距離到期日尚遠，又有咁大嘅槓桿率，波動起上嚟都相當驚人。
聯想（992）盈利微跌1%，俾人柴台，周三散6.1%，跌落2.30元，跟住兩日彈番上2.425元，吼住有機會回順時，收啲Call輪9659，遠期輪，今年12月夠鐘，現價8.8仙，溢價好高，去到22.4%，但有槓桿率27.6倍戥住，呢件係高風險、高回報貨色，上落快，注碼要克己。
有幾隻公司輪郁得好厲害，都係由正股帶動。萬順昌（1001）升9.6%，561輪少少成交，升16%。明年11月到期，現價18.5仙，溢價19.7%，槓桿率6.2倍。咁嘅溢價，值博率唔高，買賣難係另1項缺點。
冠軍科技（092）升1.6%，1134輪升14%，明年1月到期，現價18.3仙，溢價8.4%，槓桿率6.8倍，數據合理，吼正股回吐時買輪。
章盛