亞姐出身的楊恭如近年專注發展電影事業，但她一年只拍數齣電影，片酬不算高，卻仍有能力租住半山豪宅，予人支出與收入不平衡的感覺。
對此恭如表示拍罷《風雲雄霸天下》一片後，已順利打開中港台市場，更透露有一次她在上海晚膳時，連鄰坐的日本人都認得她曾參演《風雲》，故現時她在內地接拍劇集收的是一線女星價錢。
恭如又指自己不算揮霍，故一年約花三個月時間接拍一部四十集的內地劇，便夠她全年使費。
恭如說：「我呢兩年工作得好開心，係因為我可以選擇自己想做嘅工作做，價錢重唔錯，好似我上年拍咗《齊天大聖孫悟空》，又去咗台灣三個月，同方中信拍咗部劇《一切從結婚開始》，老實講已經夠我食成年，我又唔鍾意亂買嘢，唯一對居住環境要求高啲，我只想住嘅地方舒服啲，人都會靚啲開心啲，除此之外我都唔亂買衫，工作時幾乎都唔使用錢，賺嘅錢足夠自己用。」
對於被指工作與收入不相稱一事，恭如笑說：「以前我會嬲到喊，但𠵱家得啖笑。亂寫嗰啲人見唔到我做嘢時有幾辛苦，喺零下四十幾度吊威吔，唔係我賺唔到錢，係佢哋太膚淺，算啦，今日寫完我，聽日又寫第二個，唔好太過份就算，最緊要張相影得靚。」
不過，對於一些有傷害性的報道，恭如聲言一定還擊，她說：「人對我好，我對人好，我諗人人都係咁，只要我知道自己係正確嘅，點解唔出聲？理虧嘅人先唔敢出聲。」至於近日有傳恭如欲換車及換樓，她否認說：「我以為我部車出咗新款先去睇，點知原來係出年先出，所以出年先換啦。至於搬屋就唔會住，我係鍾意得閒去睇吓示範單位，但我𠵱家住緊嗰度好好，日日起身睇海景咁舒服，真係唔想搬住。」
