正所謂平有平食，貴有貴食，下下都話幾百蚊食餐飯，未必人人花得起。其實要喺太古坊搵平食都唔係難事，好似食神爆漿貢丸、麥嘜蒸大包、滑滑啫啫鮮奶蛋撻，都係呢度嘅平霸「食力」台柱，另外呢度重有一個幾十蚊嘅印度菜午餐Buffet，冇食過嘅人，唔好話畀人知嚟過太古坊搵食！
穿過海光商場嘅窄巷，走到盡頭，就會見到一間門面好細嘅媽媽印度餐廳，餐枱唔算多，頂多坐到二十零人，不過老闆Sekar係正宗印度人，雖然來港已20多年，但對自己所煮嘅印度菜，仍然有着一份堅持：「我唔會好刻意將呢度嘅印度菜，調校至適合香港人；我喺家鄉都係一直做廚，所以正宗印度菜係咩味道，你都可以喺度食到！」可能就係呢一份堅持，再加香港唔係太多地方食到100%純印度菜，所以附近嘅白領一族就最愛呢份印度「媽媽」風味，不過最緊要係價錢唔貴，$78自助餐，重唔收加一，如果喺中午12時15分前結帳離座，重只係收$68，呢個價位，去一般印度餐廳只係點到一味菜咋！
媽媽印度餐廳（28805334）
地址：糖廠街9-15號海光商場1號舖
營業時間：上午11時至下午2時半；晚上6時至10時半。
一套《食神》，令「爆漿瀨尿牛丸」傳到街知巷聞。喺太古坊開小食店嘅Daniel話一於照跟，4年多前喺海堤街開咗間「海堤小食」，稍稍變通，改賣爆漿貢丸，生意一樣咁勁：「爆漿丸嘅餡料主要取材自台式肉燥，丸身則有豬肉、牛肉、蝦肉、鯊魚肉……等，食法變化相當大！」
試食時，發現肉燥成份差唔多佔了半個爆漿丸嘅「丸心」，輕輕咬上一口已經馬上肉汁四溢。唔好睇小佢舖仔細細，但日賣超過2,000粒，「𠵱家全港只有我哋獨家做爆漿貢丸，重做埋批發，大家有時上酒樓或茶餐廳食到嘅爆漿丸，都係問我哋攞！」不過要食最新鮮嘅爆漿貢丸，當然要嚟太古坊呢邊啦！
海堤美食（25627566）
地址：海堤街6-16號龍景大廈地下5D2
營業時間：上午8時至晚上10時
老闆Tony20多年前做西式包點出身，但早年喺美加做麵包師傅嘅日子中，發現就算做得幾好，都好難得到外國人認同，於是一氣之下喺95年回流，搞咗呢間聖羅蘭，唔做西點做中式蒸包，估唔到急速上位：「我哋糅合咗西式包點做法，提倡健康飲食，以前師傅教落，做中包最緊要用豬油，咁先夠香同鬆，但我就覺得用植物油會健康好多；而種類就更多更新，好似純麥、黑芝麻、甘笋、粟米蒸包，都係將西式包點意念，融入中式包點中，健康又有風味！」難怪每日午飯同傍晚放工時段，都大排長龍，聽講最受落都係OL，當午餐食可減肥！
聖羅蘭（25616130）
地址：香港英皇道985號地下
營業時間：上午7時至晚上8時
請大家開始對表！每日下午3點，龍珠餅店就開始有鮮奶蛋撻同酥皮蛋撻出爐！老闆話整得好食嘅不二法門，就係要用料新鮮，去貨夠快，「每板蛋撻一出，基本上唔夠二十分鐘就賣晒，所以三點過後，無時無刻都係賣緊新鮮出爐蛋撻，你話有乜方法唔好食！」。
龍珠餅店（22140730）
地址：英皇道993號德利商場地下3號舖
營業時間：上午5時半至晚上8時
午飯時段海光街有一個怪現象，你會發現一班又一班嘅OL，好似蜜蜂見蜜糖一樣，圍住一間舖仔，往內一望，原來呢度係專賣果汁同生果杯。$12買到一大杯新鮮生果，裏面有泰國金柚、士多啤梨、荔枝、火龍果、奇異果、紅提子、菠蘿……等等，杯杯不同，乜嘢生果都有，據唔願上鏡嘅OL表示，減肥嘅人會當生果杯係午餐，就算平時食完飯都會食番杯。
巴士比（25612779）
地址：海光街海光苑20號
營業時間：上午6時至晚上7時
煲仔飯大家食得多，煲仔麵相信好多人連聽都未聽過！海光街重有一間非常人氣嘅食得廚，佢哋有款非常創新嘅煲仔麵！老闆話呢度附近嘅白領一族，成日都話食無定時，一日幾餐都要出街食，特別追求超熱辣新鮮嘅口感，所以靈機一觸下，創下煲仔麵！一底雙拼煲仔麵$25，以後每加一餸就加收$2，都幾抵食㗎！
食得廚（34279738）
地址：海光街20號地下
營業時間：上午7時半至午夜12時