一班是非男女如余文樂、盧巧音、謝霆鋒、馬浚偉和郭羨妮，昨日同為「心連心全城抗炎大行動」主題曲錄音，只見被視為對頭的阿樂和霆鋒有講有笑，而郭羨妮和馬浚偉則面左左，只與郭晉安傾偈。
梁詠琪（GiGi）、盧巧音（Candy）、余文樂、謝霆鋒、郭羨妮和馬浚偉等近二十位藝人和歌手，昨天與政界和其他界別代表，雲集港台為「心連心全城抗炎大行動」錄主題曲《香港再起飛》。
盧巧音與兩位舊愛阿樂和霆鋒同場出現，Candy與霆鋒不時在台邊咬耳仔，相反對阿樂則視而不見。而霆鋒和阿樂在台上中間只隔着GiGi，當阿樂和GiGi談得興高采烈之際，霆鋒主動搭訕，與阿樂有講有笑，狀甚老友。
阿樂接受訪問時說：「我同佢（謝霆鋒）第一次見，頭先打吓招呼，佢話有睇《無間道》，我就話多謝，我覺得佢幾好，幾nice幾有禮貌。」談到舊愛Candy，阿樂說：「sorry，我真係見唔到，唔緊要啦。咁多人嚟做嘢，又唔係嚟打麻將，見唔到都唔出奇。」
昨天氣溫高達攝氏三十度，但霆鋒仍穿皮褸皮褲到場。對於有人在網上聲稱擁有霆鋒已訂購的同款法拉利，並將之兜售，霆鋒表示不知情。
而霆鋒接受商台節目訪問時，被問到認不認同張栢芝指香港記者講大話時，他說：「我唔想概括所有記者都唔好人，可能有歪曲咗，但我哋都要負啲責任。」
另外，馬浚偉和郭羨妮在台上被安排站在前後排。見二人在後台各據一方，在台上亦沒交談，郭羨妮卻與郭晉安言談甚歡。
事後郭羨妮說：「我有見到佢，但冇傾偈。今日大家一齊唱歌，唔好將attention放喺邊個同邊個冇傾偈嘅無聊事上面啦！」馬浚偉則說：「排位係港台排嘅，我好堅持自己嘅諾言，我永生都唔再講。」
