放工邊度HappyHour最好？去蘭桂坊總覺得人「鬼」殊途，玩得唔夠投入，中區唔玩就去東區，鰂魚涌嘅太古坊，呢度酒吧唔多，但就搞到逢星期五爆到八彩。呢處有乜咁掂？啲客夠斯文但玩得夠放，食物又OK，啲酒保又經常同顧客打成一片！
由之前嘅WildOrchids轉為家陣嘅ThaiOrchids，在太古坊有頗長歷史；吸引之處除咗有出色泰式美食外，還有最正嘅多國籍文化。何謂多國籍文化？即係店內有不同國籍嘅員工如菲律賓、泰國、印度、尼泊爾等，與中、外顧客，久而久之大家成為老友，繼而演變出這所聯合國酒吧。
令全場食指大動嘅泰式燒豬頸肉沙律，以泰國石仔爐燒，豬頸肉乾身而不油，入口極鬆化，至正都係佢哋嘅配汁，用十多種泰國調味料炮製，勁正！
當酒保已有10年的阿Dong，令他最開心嘅，就係每晚有好多熟客要品嘗佢自創嘅雞尾酒，呢晚，Dong就溝咗兩杯出嚟趁熱鬧。前為MintMargarita，青檸加入多種酒精，薄荷酒味較重；後面一杯SexyMotherF...（名稱不雅唔可以出街！），少許伏特加多種生果汁，女性啱飲。
ThaiOrchidsCafe&Bar
電話：28569848
地址：鰂魚涌太古坊糖廠街39號地下
營業時間：上午9時至晚上11時（HappyHour下午4時-9時）
與「97」酒吧同一老闆、由前身「Q」轉為CafeEinstein，先後在太古坊已有7年。之前「Q」係玩Funky及Trendy路線，家陣全店裝飾大多來自奧大利，裝修有濃烈嘅歐陸色彩。奇怪的是外國人鍾意坐吧，港客則喜歡坐喺室內嘅雅座，有點河水不犯井水之感；不過，由於環境優雅，得到一班附近返工嘅OL垂青，周不時嚟Lunch及飲酒。飲酒必然趁下午4點至晚上9點嘅HappyHour，每杯啤酒正價$45，HappyHour買一送一，閒日嚟最旺場。
CafeEinstein
電話：29600994
地址：鰂魚涌太古坊糖廠街33號地下
營業時間：上午11時至晚上11時
問過好多住喺太古城嘅朋友，都有嚟食過Lunch，其中呢款燴羊膝最多人捧場。以紅酒燴熟羊膝，肉質嫩滑好入味，另有雜菜、香草伴碟，賣相一流。
夏先生（科技商務）：
「今晚係第一次同朋友嚟，路邊太陽傘嘅座位幾舒服幾有mood，不過消費幾高，如果啤酒平多少少就更加好。」
嚟到第三間酒吧EastEndBrewery，感覺呢處有三大不同，一是通地花生，任你食、任你亂拋垃圾；二來港客較外國人多，男女均有，而且毋須到周末，平日HappyHour嘅4pm至8pm一樣咁多人，座無虛席；最後不同係佢哋係香港第一間有自製生啤嘅酒吧，TooSoo及AldrichBay，生啤每大杯售$38，HappyHour買二送一，小麥味濃。
EastEndBrewery
電話：28111907
地址：鰂魚涌太古坊糖廠街23-27號地下
營業時間：上午11時至晚上11時
超級打躉客George（電腦人員）：
「除咗朝早唔嚟，星期日放假唔嚟，基本上日日放工即嚟報到。呢度氣氛好正，靜得嚟又夠熱鬧，而最搞鬼逢星期四必有駐港戇豆先生阿Paul表演，好抵死㗎！」