蔡少芬、黎姿、李思蓓同羅泳嫻成班女藝人，噚日喺藍灣半島會所為無綫新劇《黑夜彩虹》宣傳。幾位女藝員以水着示人，其中李思蓓最搏，以三點式泳衣上陣騷身材，而吳啟華嘅女友羅泳嫻就勝在意態撩人，反而身材向來突出嘅黎姿卻穿上小背心同短褲，與蔡少芬一樣只係露出小蠻腰。
黎姿話有感冒在身，所以坐喺大水泡嗰陣亦要人扶住以免濕身。而蔡少芬就一直坐喺橡皮艇上，問佢點解唔敢落水，蔡少芬話：「因為我一陣有嘢做，唔想整濕個頭，好耐冇着過泳衣宣傳，我好保守，好嘢唔想流出去，無端端益人就冇意思。」
曾代母還債嘅蔡少芬，被問到李彩樺近日亦要代父還債一事時，佢就話：「我祝福佢開心啲，希望佢更堅強。」
梁漢文噚日出席港台抗炎活動，對於有報道話鄭秀文（Sammi）同古天樂一齊去唱K，竟然俾許志安嘅老友撞到，問梁漢文係咪佢？佢話：「我前兩晚同蘇永康去唱K，後尾知道Sammi喺隔籬房，康仔就話過去，Sammi嗰晚同唱片公司啲人一齊，冇話有古天樂。」問佢係咪只係想隱瞞件事，梁漢文話：「點㩒呀？」
利嘉兒加盟新城娛樂台嘅首任工作就係訪問王傑，喺訪問入面，王傑話：「香港藝人講國語好嚇人，講得唔好嘅原因係佢哋冇用心去研究自己國家嘅文化。」而佢就覺得張學友國語最好，但同公司嘅陳奕迅，佢就話怪怪哋。
蔡依林噚日喺台灣同香港嘅傳媒做咗一個視像訪問，蔡依林喺佢新碟入面有隻歌叫《布拉格廣場》，MV入面搵咗個小朋友幫手，佢嘅造型好似周杰倫，咁啱首歌有段rap係周杰倫演繹，問蔡依林係咪特登咁做？佢話：「小朋友是周杰倫找的，我不知道他小時是甚麼樣。」
陳豪無端端多咗個女朋友，佢自己都唔知，成日俾人笑，噚日佢返將軍澳拍劇，俾人問佢麥浚龍助手Daisy係唔係佢女友，佢話：「唔係啦！佢以前係我助手，今次佢真係好慘，如果係因為呢件事搞到佢冇咗份工，就真係唔好。」問佢有冇安慰Daisy，陳豪話：「冇得安慰，我唔好意思，寫得人咁肉酸。」
