與楊恭如傳過緋聞的上海富商周正毅，近日被傳出現財政危機，恭如昨日接受本報專訪時，表示不欲提起對方。不過恭如卻大談愛情觀，直言「呢個世界冇話邊個冇咗邊個唔得」，又指自己仍然渴望愛情。
--愛情篇
楊恭如入行八年以來，除被傳與古天樂及上海富商周正毅交往外，鮮有緋聞傳出。近日有傳聞指周正毅在內地遭扣查，又傳他經濟出現問題，對此恭如堅持不回應任何有關周正毅的問題，她說：「唔關我事嘅嘢唔好嚟問我。」
自言十分介意公開感情事的恭如，卻十分樂意分享自己的愛情觀，她說：「如果我拍拖，未到結婚嗰日我都唔會公開，我唔想俾人撩出嚟講，我認唔認都係麻煩，所以我唔答。」
因此恭如對與周正毅是否仍是朋友的問題，亦不作回應，但她說：「我有好多朋友，朋友唔使成日掛喺嘴邊，好似袁潔瑩、黎淑賢同埋契媽林建明佢哋同我都好好，但我冇必要成日講住佢哋。」
無論有過甚麼不愉快的經歷，恭如都相信女人一定需要愛情，但坦言愛情不會是她生命的全部。恭如說：「我信愛情，但我唔會為咗一個人，不顧一切放低所有嘢，咁好唔理智好無知。我要兩個人一齊係開心嘅，大家有大家嘅空間，即使有時嗌吓交，都係情趣。但如果到最後發覺大家唔啱對方，我唔會夾硬嚟。」
若發現身邊人並非真命天子，恭如又會如何承受失戀？她說：「我係理智型，呢個世界冇話邊個冇咗邊個唔得，有幾唔開心幾難過，生活仍然要繼續，世界唔會因為咁而停落嚟，我重有家人、工作同朋友，過一段時間一定會冇事。而且我認為人唔應該靠人哋畀快樂自己，應該係自己令自己快樂，唔可以太依賴一個人，我唔會太投入喺一段感情入面。」
問恭如與舊愛能否再見亦是朋友時，她笑說：「要再見先知，我同以前所有男朋友分手後都冇再見過面，真係好奇，緣份盡咗就連見都見唔到。」
雖然自小父母離異，但恭如卻不害怕婚姻，更十分憧憬未來有個幸福的家，能為愛人生一個兒子。恭如說：「係女人都要結婚生仔，但我唔會急，因為我要一段長久嘅婚姻，係一世嘅。結婚唔係鬥快，係要鬥幸福，我寧願冇都唔想求祈。我諗我過多五、六年，思想成熟啲先會考慮呢個問題，𠵱家唔急住。」
恭如又透露理想中的另一半，是個能給她安全感及幸福家庭的人。恭如抬頭看着窗外的藍天，一臉憧憬地說：「係一種感覺，只要同佢一齊就會覺得好溫馨、好幸福嘅話，咁我願意陪佢飲水捱麵包，都會好開心。」
撰文：蔡如玉
攝影：林德雄
部份服裝提供：LaneCrawford
場地提供：Teca
髮型：Elainebyheadquarters
