人應該抱有希望，永不放棄，正如香港一樣，眾志成城明天必定會更好。
去了三次泰國喀比Koabi，每次都遇上雨季，大煞風景，但我偏唔信邪，無理由第四次都咁黑仔㗎！果然皇天不負有心人，今次去除了幾陣驟雨外，一切也好，陽光好、酒店好、心情自然也好。
撰文、攝：胡慧冲
沐浴大自然 去泰國玩，浸Spa已是指定動作，無論任何旅遊區都總會有Spa，喀比作為一個國際旅遊區，Spa亦係唔少得嘅環節。當中最有睇頭嘅，原來就係一間叫MaritimePark&SpaResort之內，佢哋嘅Spa係建於一個浮台之上，浮台則喺湖上面，邊浸邊欣賞大自然湖光山色，一絕也！
Erica本身係泰國人亦好鍾情Spa呢種玩意，佢話曼谷啲Spa好就好，但偏偏欠缺大自然感覺，而呢度就啱晒佢要求。
喀比是泰國南部一個以海灘馳名嘅地方，由布吉搭兩小時車就到。此外亦有內陸機由曼谷飛喀比，喺車程中可以睇到市內一些奇景。例如喀比市內怪石多多，好哋哋一間屋後面有座非典型怪石山，十分有趣，每個山石都有不同形狀，全泰國只有喀比呢度至有如此奇景。
泰國都有露天溫泉？唔係講笑，係真係熱水溫泉，重要喺山林之中。喺喀比就有兩個，而且兩個都喺郊區，其中一個重喺樹林之內。穿過郊野公園，沿途鋪了一些齊整石屎路，環境好清幽，突然見到有個路牌，一邊指Spa，另一邊指HotSpring。原來所謂Spa係指一個露天大溫泉，石頭下嘅水全是熱水，唔少泰國人都聯群結隊嚟玩，不過就見唔到有泳衣少女落水。佢哋都習慣連衫帶褲一齊落水。
其間我結識到曼谷人阿Sai，佢同啲同學一齊參加泰國團嚟呢度玩，佢話因為「沙士」，泰國嘅旅遊業大受影響，當地就提倡「UnscenThailand」，叫泰國人去看看未看過的泰國，一來團費平，二來可以幫到自己國家嘅旅遊事業，何樂而不為。
之後佢重濕住身帶我行去另一邊嘅HotSpring。呢個溫泉十分隱蔽，藏於山林之中，入面有溪水小瀑布，水也是熱的，喺石林山澗之中浸溫泉，喀比原來咁好玩！不過，如果自己去會好難，可以試話參加當地LocalTour。
出外採訪也好，旅遊也好，很多時都會結識到一些新朋友，雖是萍水相逢，但畢竟也是一份緣，就好像我跟Chen。Chen是新加坡人，雖則新加坡政府早前不太願意國民出外，但為了吸取一啖新鮮空氣，為了完成「向上爬」的心願，Chen專程嚟到喀比，因為呢度最有名嘅係攀石。Chen外表文質彬彬，成個文弱書生款，在芸芸歐美大隻佬遊客中，Chen算係細粒嗰個，但身手也算不錯。擁有兩年經驗的他話攀石不但可鍛煉意志同體能，更重要係那種向上爬的能耐，就好像現實生活中個個拚命向上爬，有人為求達到目的不擇手段。「人同人相處嘅學問比攀石更難，攀石危險，但也有安全措施，但同人相處笑裏藏刀，防不勝防。」他還笑言很喜歡喀比，那裏有點與世無爭嘅感覺，想在此長住。
網址：
去喀比一定唔少得去外島玩，佢哋附近嘅外島，島形十分怪異，似鐵釘又有，似龜又有，似雞都有，完全係水清沙灘，當日我就坐咗30分鐘快艇去咗個雞島ChickenIsland。雞島原來係連住個叫TubIsland嘅小島，相連嘅小沙灘喺水退之時可以清楚見到左邊右邊各自有水沖埋岸，之後又各自分開，很是奇特。
喺呢個島上面有唔少遊客喺淺水之處玩浮潛，睇珊瑚魚，泰國遊客、歐美遊客都有，但中港台卻欠奉。喺岸邊我就搵到嚟自澳洲嘅Peter&Mary，原來此行係佢哋度蜜月之旅，據Peter講本來打算去菲律賓，但Mary怕治安唔好，再加上近日Peter喺網上見到張好靚嘅相。相中有個靚海灘，結果就決定同Mary嚟呢度度蜜月，以佢哋所見，唔止水清沙靚重好多珊瑚魚，啲魚重會追住人去攞麵包食，兩公婆都不約而同咁話不枉此行。
不少人認為去泰國一定要住得豪，因為生活指數低，貴少少已經可以住到PavilionQueen'sBay，呢間酒店最大特色係個泳池，可以望到山景及海景，一池兩景，十分寫意。間房亦十分大，黑金古典設計，露台更是超大，而且有張大吊床，瞓喺度睇書睇風景，搖呀搖，搖呀搖，好有Feel，酒店內亦沒有Spa，環境也不錯，行出路口更有FactoryOutlet可以滿足你嘅購買慾。?
網址：
至於平價酒店，同樣位於AoNanyBeach之上，這間PhraNanyInn外更是木排屋，但入到去感覺很另類，扮木屋設計，全部都很有原始感覺，實而不華，但甚有風味，1,600銖一晚，這間酒店只可自己打電話或Fax去Book。
電話：（66）75-637130
傳真：（66）75-637134
網址：
出門提一提
機票：乘坐泰國東方航空往布吉，來回票價$1,483（連稅）。連接送往喀比，包酒店連早餐$2,840。查詢：27700966（奧運旅行社）
簽證：持BNO及特區護照毋須簽證。查詢：25216481（泰國領事館）
網頁：
簽證：1港元兌5泰銖
鳴謝：泰國政府旅遊局（香港辦事處）、泰國東方航空公司