曾幾何時，上海幫在本地股市風起雲湧，但今次中銀老總被調回京，加上「上海首富」被扣查謠言滿天飛，市場對上海幫主理嘅股份充滿戒心，好似曾令香港炒家大開眼界嘅新萬泰（433），噚日突然急跌19.89%，收0.141元。
經紀陳話，新萬泰早兩年曾經在本地股壇威過一陣，不但話在上海搞地產，重話投資高科技，尤其係後者更隱約與江總位公子拉上多少關係。
新萬泰後來更一度做白武士，收購大廚嘅明珠興業，變成家陣嘅新銀集團（988），但最後將所持一半權益，賣埋畀個拍檔。
呢啲風光往事已經不再，查實新萬泰股價急跌，今年發生過唔止一次。
經紀陳話，今次新萬泰急跌，應該唔止受「上海首富」隻上海地產（067）牽連咁簡單，佢聽班大陸炒家講，應該重有古仔跟尾。
經紀陳講完一大輪，其實只得一個結論：就係叫小初唔好手多多，無端白事走去博反彈。
慕容小初