爬格子動物每日寫方塊專欄，係香港獨有產品，世界所無。外國名家有專欄，只限每星期一篇；台灣報紙有專欄，亦係每周每月特約，好似香港風格嘅專欄副刊（例如名采），未見過。
左丁山自細就睇專欄，喺專欄學到好多雜學，係讀書考試學唔到嘅，歷年來睇怪論、笑話，都睇過好多，但睇完冇耐就唔記得，忘記晒，即使記得，亦對自己嘅學問知識冇貢獻。
香港人寫專欄，各有作風，唔通一個專欄日日寫床上故事、女人內衣褲、阿松風流，有讀者覺得過癮之後，你又照學照寫咩。如果全部副刊專欄大一統，人人講笑話，人人寫女人男人，或者人人寫食經、旅遊經，人人學李碧華（可惜香港只有一個），人人學王岸然，你估讀者會唔會走晒呢？
香港專欄副刊編輯（或者係選邊個寫專欄嘅領導）嘅功力，就在於選擇唔同風格嘅爬格子動物，寫唔同形態嘅內容，令讀者各取所需，好少讀者會全部專欄都睇晒嘅，最多睇三至四個，所以唔同專欄有唔同嘅收視率，如果報紙有一百個讀者，一百個都睇專欄，專欄副刊就好成功嘞。
副刊編輯選定爬格子動物之後，可以只睇收視率，唔使睇內容。假如報紙讀者有一百人，只得三十人睇副刊，老細不如炒編輯魷魚，重新組合；假如一百人都睇副刊，編輯應該加薪。但一百人之中，只得十零人睇左丁山，就要炒左丁山魷魚咯。講多無謂，食多會滯，點理得人哋專欄寫乜嘢，有客睇就係好專欄啦！