一般人心目中嘅一日五餐，不外乎早餐、午餐、下午茶、晚餐及消夜，不過位處「白領重鎮」嘅太古坊，飲食文化可能受到西人飲食習慣嘅影響，最與別不同之處，就係消夜時段想搵間舖頭食好啲都幾難，不過換嚟嘅，就係盡情暢飲嘅5點鐘HappyHour。想知道喺太古坊點樣中、西合璧豪盡五餐，就一定要留意以下心水推介！
早餐
話晒太古坊都係高級寫字樓區，所以就算係簡簡單單一個早餐，都食得特別豪！驟眼看門面，佢只係一間普通粥舖，但出品就真係貴氣到你唔信。
珊瑚蚌魚片粥$35（右）
當中代表作，首數鮑魚滑雞粥，鮮鮑片嘅香味再加滑雞嘅鮮味，真係食完成朝個口都留有餘香！抵玩啲嘅，重有款一樣咁豪氣嘅珊瑚蚌魚片粥，珊瑚蚌爽口，配上魚片嘅鮮味，零舍合拍！想再平啲？可以食及第粥、艇仔粥之類，價錢只係十零二十蚊，都好經濟，不過難得佢個粥底係落重本嘅「鮮魚湯底」，嗰陣魚鮮味，同一般粥好唔同！
許老爺靚粥
電話：25908836
地址：鰂魚涌太古坊海光街30號地下
營業時間：上午8時至晚上10時半（星期日休息）
講到太古坊呢邊最當紅嘅西式早餐，當然係有11年歷史嘅Sprout's三文治！一踏入門口，老闆就不厭其煩咁同我講，呢度有佢哋嘅「三不門規：不准吸煙、不落味精、不收小費！」可能就係佢有全場禁煙嘅清新空氣、健康嘅食物同相宜收費，所以特別受歡迎！
Mocha$19
食家推介嘅重量級早餐，係雞肉牛油果三文治，去皮雞肉配上鮮美牛油果，夾在兩塊優質全麥包中（老闆話每塊來貨價都要差唔多$3），真係絕對歐洲健康風味！不過我最鍾意都係佢個低脂沙律油，食得滑口又唔怕肥！如果再配上一杯香濃Mocha，在太陽傘下吹着晨早微風，看着途人趕上班，真係完完全全享受人生！
Sprout's
電話：28569448
地址：鰂魚涌太古坊海灣街23號地下
營業時間：上午8時至晚上９時
午餐
太古坊位置臨近海邊，就算五月天一樣涼風颯颯，可能因為咁，露天茶座式快餐店嗰份無侷無促感覺，份外受到白領一族歡迎，唔信？午飯時段去CHICAGODOGS睇睇，行遲兩步，睇怕想喺太陽傘下搵到一個位都幾難！
墨西哥辣肉醬熱狗$35
至於呢度嘅省招牌食品，當然係漢堡包同熱狗餐啦！據稱老闆娘Virginia曾經去美國波士頓同澳洲讀書，做漢堡包同熱狗呢門手藝，就喺嗰陣學返嚟，好多老外同學食過都話好有水準！
漢堡包用料超重量級，半吋厚身牛肉，配蘑菇、芝士、鮮番茄及煎蛋，簡直係一般OL嘅兩日份量，不過好多鬼佬食過都話剛剛好！至於墨西哥辣肉醬熱狗亦係一絕，新鮮法蘭克福熱狗，淋上一層厚厚嘅辣肉醬，甚具豪情風味！
CHICAGODOGS
電話：25625681
地址：鰂魚涌太古坊海灣街25號地下
營業時間：星期一至五上午8時半至晚上9時；星期六及日上午11時半至下午6時。
睇見舖頭名，腦裏馬上出現一連串疑問，吳越之間即係邊度呀？原來即係「上海」，咁入嚟當然係食滬菜啦！老闆Calvin原來就係深圳呢期勁當紅嘅「豫園」上海餐館搞手之一，餸菜味道當然有保證。
講到呢度嘅特色菜，首選當然係大排麵，聽講塊大「豬」排，係經過濃肉豬浸泡多個小時先再炸，所以「大排」一入口，馬上肉汁四射！
而燜肉麵都好出色，Calvin話呢味燜肉係佢讀書年代，一次國內旅行中無意食到，此後便對呢味以古方炮製的燜肉念念不忘，後來再經自己慢慢研製，以鹹水草縛着一嚿五花腩，再用古方特製的紅米醃汁，燜4個鐘而成，用料天然、肥油盡去，特別有風味！
吳越之間
電話：29110949
地址：鰂魚涌太古坊海光街16號地下
營業時間：上午11時至晚上9時。
去過滋味館食餐嘅人，都話呢度嘅越南菜勁正宗，無他嘅！事關呢度嘅老闆基本上都係越南華橋，而家族生意一向都喺西貢開餐館，買料正宗加製法照足傳統，味道當然一流！
夠晒特色嘅妃子骨，其實即係炭火燒羊肋骨配青瓜沙律，香口而唔熱氣。老顧客林子祥同佢太座葉蒨文，必揸車嚟幫襯！
這道6月才推出嘅新菜式，以高濃度威士忌醃肉，煎熟時再以黑椒汁撞香，入口時酒香肉又香，真係配合得難分難解！
滋味館
電話：28112159
地址：鰂魚涌太古坊海光街9號地下
營業時間：上午11時至晚上10時（星期日及公眾假期休息）
下午茶
想歎最正宗Cafe？呢度都可以搵到，講嘅係CrossroadsCafe，大家唔使人生交叉點，老闆阿Van嘅沖咖啡手藝，係師承自西人師傅，所以好多歎慣咖啡嘅人，聞到門口咖啡香，就已經忍唔住要衝入嚟。
呢個驚世之作係用5吋厚健康全麥包，搽上天然蜜糖入焗爐焗製而成，好唔好食冇得騙人，所以用料一定要靚，先做得出呢個效果！
未飲前覺得有啲怪相，不過入口先發覺真係講唔出咁夾，咖啡嘅香味，再添加新鮮生薑汁嘅辛辣味，入喉勁舒服正氣！
CrossroadsCafe
電話：25656897
地址：鰂魚涌太古坊海光街18號地下
營業時間：星期一至五上午7時半至晚上8時；星期六、日及公眾假期營業至下午5時。
太古坊OL下午茶必蒲點，當然係設計勁In嘅Mix啦！呢度嘅泰式薄餅卷好有特色，顏色紅紅綠綠，吸引食慾！
咖喱雞卷$28（右）
OL食客推介嘅咖喱雞卷同印度烤雞卷，純雞肉唔連皮，食得健康，不過最過癮係個煙煙韌韌嘅薄餅皮，勁有咬口。
呢杯啖啖果肉嘅16oz香莓派對，裏面有齊藍草莓、紅莓同士多啤梨，勁高維他命C，健康一族最啱！
Mix
電話：25627313
地址：鰂魚涌太古坊海光街13-15號海光商場14A地下
營業時間：上午7時至晚上8時