港府嚴打垃圾蟲，手段包括終止公屋租約等，希望今次唔係雷聲大雨點小，不但要市容清潔，更要進一步美化香港環境，強化本港旅遊業，香港人亦毋須去海外才可以唞氣充電。此外，值得欣慰係政府今次毋須花幾千萬元輔導「病態吐痰者」作為政治籌碼，納稅人慳番一筆，有進步，有進步。
期指結算，港股冇乜大變動，恒指牛牛皮皮又一日，微跌2點，收報9508，成交82.79億元。工業股大股東的批股套現浪潮仍然持續。
噚日傳出福田實業（420）大股東批2000萬股舊股，每股作價6元。呢排唔少工業家發大達，福田01年初，股價只係0.60元水平，兩年半之內股價升逾9倍，重可以高價大手批股套現1.2億元，真係恨死隔籬。
前日黑客叫阿虎留意隻渝港國際（613），噚日果然有料到，股價勁升22.22%，收報0.044元，成交325萬元。阿虎問黑客係咪有內幕消息，佢叫阿虎咪亂講嘢，內幕交易屬犯法，而且好大罪。叫人留意渝港，純粹係憑第六感與研究渝港財務表現嘅心得，並非有內幕消息。
長和系旗下股份被輪流追捧，長江生科（8222）炒完一輪後，呢兩日開始腳軟，噚日跌4.4%，收報1.74元。不過，就輪到和記港陸（715）開車，噚日勁升8%，收報0.68元，成交達1.02億元。Cookie話，長科炒抗炎補藥概念，但和記港陸就真係唔知想炒乜，唔通又炒私有化？但睇佢份資產負責表，去年底總資產有31.2億元，總負債5.54億元，資產淨值只得25.66億元，每股資產淨值只得0.457元，似乎冇乜私有化誘因。
阿虎