新車速報：<br>光岡GalueV8豪得辣

新車速報：
光岡GalueV8豪得辣

向以巧手精工製作，被納入日本九大車廠之一嘅光岡（Mitsuoka）汽車，一直以仿古汽車開闢市場而備受車迷追捧；繼早前推出全新GalueV6型號後，車廠最近又生產出至頂級嘅GalueV8，而首部左軚版新車，為應香港代理同時取得中國代理權嘅聲勢，首度率先在港亮相。相信繼後正式踏足中國市場，定必帶來車迷不少迴響，而香港車迷就要耐心多等一會，遲吓至可以近距離接觸呢部咁正嘅房跑車喇！

記者、攝影：陳偉林
部份圖片由光岡汽車提供
逢星期一至日刊出

外表顯現　個人風格
外觀上，呢部新款GalueV8跟早前抵港嘅GalueV6相若，惟近距離接觸下，你會發覺整個電鍍鬼面罩頂端，既有Mitsuoka嘅字樣，又有原廠廠徽，而兩旁大燈重係高聚焦車燈組合，望落格外炯炯有神之餘，四輪加大碼18吋跑車合金胎軨組合，重將部車烘托得好有跑車嘅剛勁感；兩旁新款附有方向燈嘅門邊電鏡，還有車尾電鍍眉裝飾，以及雙出式尾喉配搭，都係GalueV8獨有㖭！



設備豪邁　一應俱全
打開車門所見，呢部左軚版GalueV8，比早前任何一部「光岡」汽車，都要來得豪邁高貴，前後兩排高級皮椅，軟滑貼服富承托力外，既有中央手枕同獨立頭枕組合，而前排重有全方位電控㖭！再者，響雙色皮革及桃木修飾下，兩截式嘅中控台，除置有LCD行車電腦顯示屏外，佢重有一個好有特色嘅「光岡」時計呢！除電窗、電鏡及電天窗外，還有一套七個喇叭連重低音嘅6碟CDBose高級音響，還有左右恒溫冷氣、定速巡航等等；當然唔少得重有四個安全氣袋，同埋電子導航儀裝備㗎！

■分上下兩截嘅中控台，既有5.6吋多功能顯示屏，又有Bose高級音響及恒溫冷氣。

■前後兩排皮椅剪裁貼身舒適，空間闊落之餘，前排重備有全方位電控。


4.5公升V8偈　迸發驚人輸出
若然早前你見識過部GalueV6的話，相信你對目下呢部左軚GalueV8更會讚不絕口；皆因一台4.5公升嘅V8偈，輸出平均有勁，尤其起跑加速反應更為印象深刻；再者，四輪經強化改裝嘅懸掛柔韌有力，走彎循迹性可靠又穩定，加埋主動式電子VDC、TCS，重有四輪高效能透氣碟煞、ABS連EBD裝置，就算以極速馳騁，亦能予人信心十足。遺憾短時間內GalueV8未有生產右軚型號，有興趣嘅本地車迷，就真係要多等一會喇！

記者試後簡評
呢部左軚版GalueV8，比早前到港嘅GalueV6，造工講究設備一應俱全，包裝重好有古典房跑車嘅風味；惟High-tech嘅車廂鋪排，重匹配有最新5前速半自動波，起跑加速反應教人印象深刻。

光岡GalueV8規格
引擎：4494ccV8DOHC
馬力：340ps/6400rpm
扭力：46.0kgm/4000rpm
傳動：5前速半自動波，後輪驅動
懸掛：（前）柱式獨立（後）多連桿
制動：（前）透氣碟（後）透氣碟（ABS）
輪胎：235/45R18MichelinPilotHX
尺碼：5140×1770×1463mm
軸距：2799mm
車重：1808kg
新車售價：8萬美元（國內未連稅）
車輛提供：恒昌汽車（24436393）