電影《22世紀殺人網絡2決戰未來》近排喺全球掀起熱潮，我羅拉啲老友口邊經常都掛住句"HaveyouenteredtheMatrix?"，而最近電影公司亦乘機推出卡通DVD《Animatrix》，入面有九個由世界知名動畫大師炮製嘅短篇動畫，絕對唔比電影輸蝕，唔同風格嘅電腦動畫技術加埋《22世紀》嘅概念，真係拍得非常悅目，最正都係唔使再聽啲主角講道理，大噴口水。
《Animatrix》打頭陣嘅動畫，係由《太空戰士之滅絕光年》嘅AndyJones主理嘅《勇者無缺》，入面嘅女主角十足十《神探俏嬌娃》嘅劉玉玲，佢重同貌似黑人演員羅蘭士費斯賓（LaurenceFishburne）後生版嘅男對手比劍，女主角俾人舞到得番件內衣，極之香豔。而短片入面嘅飛船打怪獸場面，亦同電影版一模一樣，因為都係出自同一班幕後精英手筆嘛！
而其他短篇動畫都唔嘢小，《妖獸都市》導演川尻善昭操刀嘅《Program》，嚟個日版古裝決鬥；《青之6號》前田真宏製作嘅《TheSecondRenaissance》，就講人類點解會受到機械人統治，當中重有女機械人慘遭強暴嘅暴力鏡頭；至於渡邊信一郎拍攝嘅《Kid'sStory》，則講年輕人學《22世紀》主角跳樓，不過真係好擔心會惹起非議。