李彩樺的父親從前經營海味舖，這位太子女自小就是溫室小花，雖然她現要代父還債，卻從無恨意。而當年父親冒着八號風球，給子女買玩具的情景，李彩樺至今仍歷歷在目。
李彩樺（Rain）生於小康之家，其父早年開設海味舖，母親是位典型的家庭主婦，她是家中長女，下有小她一歲的胞弟李建中，一家四口本來樂也融融，阿Rain亦一直是朵溫室小花，沒有遇過甚麼大風雨，想不到這位太子女現在卻要為父還債，確是令人欷歔。
不過，阿Rain沒有因而痛恨父親，在她的心目中，從前的溫馨家庭生活，至今還歷歷在目。日前阿Rain在跑馬地接受訪問時說：「我爹哋係一個嚴父，佢比較沉默，內斂一啲。以前我同細佬百厭嘅話，佢都會用啲衣架仔打我哋，不過我覺得嗰時爹哋都係錫我哋，我好記得有次爹哋話帶我哋去玩具反斗城，但嗰日啱啱八號風球，佢都帶住我同細佬去買玩具，因為佢唔想我哋唔開心，而媽咪就喺屋企煮定飯，等我哋返嚟。」
阿Rain的母親是個賢妻良母，很疼錫一對子女，小時他們最愛舉家同往舖頭，一同打理生意。
而阿Rain與胞弟老愛扮收銀員，她說：「我哋好鍾意企喺個收銀機度，當然都只係扮吓嘢，我試過收錯錢，所以通常都係畀啲大人過濾吓，我哋至敢收錢咋。」
阿Rain從前跟胞弟各有各玩，李建中愛混在男仔堆中，但在家姐面前，他卻喜歡扮弱者，她說：「細佬成日扮弱者，好識冤枉人，佢成日打完我之後，又同阿媽講話冇打過我，乞人憎㗎！佢細個都幾野蠻，份人又好動，但我哋又好好感情，𠵱家見親面，大家都好多嘢講。」
採訪：朱芷瑩
