利息低到似有若無，手上有啲錢嘅都周圍搵投資機會，原來車位都係唔錯嘅選擇。中原地產高級分區經理史世德話，尖沙嘴擎天半島嘅車位，回報有七厘半，𠵱家完全冇放盤。
史世德講，中記今個月就做咗四十三個擎天車位買賣，最平四十萬，最貴五十五萬，平均係四十八萬一個。由於樓盤一期已經入伙，但住宅同車位比例係二比一，所以冇車位嘅住客要周圍撲。
呢度嘅車位最新租金係每月三千蚊，照計就有七厘半嘞，重高過上面啲住宅兩厘幾。佢估計，租金重可以升多兩百蚊。
史世德透露，公司剛帶客買咗個擎天車位，成交價四十萬，原來個買家係有租客喺手，所以買完就即刻租得出。
四十幾萬一個車位貴唔貴，蘭西就唔敢講，因為呢個價錢已經可以買到市區一個細單位，但收到七厘幾回報，實在係好吸引。
因為「沙士」疫症，天安鴻隆實業深圳蛇口「海上世界」商業項目，延遲嚟港招商，改咗去澳洲、新加坡、日本、英國、德國等地方。噚日第一次喺香港搞路演，揀咗外國人最愛蒲嘅蘭桂坊，公司商務總監鄭樹傑話，因項目集飲食、娛樂同文化一身，且定位國際化。
海上世界包括一艘九層高嘅郵輪同海濱廣場，總樓面逾二十四萬方呎，鄭樹傑同蘭西講，已租出八成樓面，一同二樓係的士高、五樓香薰浸浴、六樓夜總會、七同八樓係名牌產品專門店，平均每呎租金二十六元人民幣，商戶將會分別喺今年十月同十二月開業。
租金叫價雖未因非典型肺炎而調低，但畀商戶嘅免租期就延長咗，由原本嘅兩三個月，加到最多六個月。頭一年租金收益會減少，但係長遠嚟講，每年可收六千萬人民幣。
長實紅磡海逸豪園第二十五座，噚日搵咗四大代理大將，封佢哋做東、南、西、北九龍區嘅元帥。各路元帥要獻計，講吓推銷策略。長實呢招真係一舉兩得，既可避免代理喺現樓撈客時爭崩頭，又可網羅各區客源。
幾位軍師都話有晒計劃，包括洗樓、寄傳單、打電話等等，重話要利用自己嘅分行網絡，開闢多啲客源。今次係短途賽，邊個謀略最掂，好快揭盅。
另外，外資基金似乎對長實盤特別留意，長實何雨盈話，近排洽購畢架山一號嘅美資基金，都有睇過海逸。
仲量聯行發表報告話，珠江三角洲已崛起，成為大都會，將會係未來嘅「新興城市」。
仲量聯行按Mercator資料庫內嘅二十五個主要指標，喺全世界五百個城市中選出二十四個具潛力嘅「新興城市」。報告話呢啲新興城市都擁有一個或以上嘅成功元素，喺面積、功能、經濟發展階段同房地產市場方面各具特色。而評選嘅時候會喺科技、環境同經濟三個主題評估，珠江三角洲就係喺經濟層面獲選。
仲量聯行亞太區策略及研究部地區董事添博文指出，珠江三角洲、上海同北京嘅房地產業，會繼續成為市場焦點。
非典型肺炎對樓市嘅影響，喺今個月嘅土地註冊處登記數字開始反映出嚟，美聯物業指出，今個月截至二十八號，樓宇買賣註冊量只有四千二百四十七宗，比四月同期少咗七個巴仙，預料全月會少過五千宗。主要係一手住宅登記勁減近六成。
中原地產就話，若果五月註冊量少過五千宗，將會係九一年以嚟第九次。
至於今年就有兩個月係少過呢個數，另一個月係今年二月嘅四千六百二十二宗。
蘭西
電郵地址：
