期指結算日，大市在高位9500水平爭持，恒指收市微跌2點，成交亦縮到82億元；6月期指收9540，高水32點，投資者普遍仍看好後市。升降指數轉弱，不計認股證的升價股172隻，跌價股378隻，主要係近期累積頗大升幅的股份繼續調整。
個別國企回吐之勢都幾急，但在低位承接力都幾強，收市亦僅微跌而已。鋼鐵股波動大，重鋼（1053）一度回到1.33元，但收番1.38元，僅跌1仙；鞍鋼（347）低見1.45元後收1.49元，跌2仙；馬鋼（323）最低0.89元，收0.92元，亦只係跌1仙。
今年要賺錢，投資國企係主流，而鋼鐵股則係最佳選擇，上半年如是，下半年亦如是。鋼鐵股急升後，出現技術調整，正係低吸大好機會。重鋼近期高位1.45元，10日線1.3元（上升中），到此水平可上車；鞍鋼近期高位1.57元，10日線1.42元，而2月初高位1.4元水平支持力頗強，可再入市。馬鋼近期升勢最急，由0.7元一口氣升上1.0元水平，10日線0.82元，若調整升幅的一半，股價回落到0.85元時可低吸。
雖有非典影響，但中國經濟增長之勢仍能保持在高水平，鋼鐵市場需求旺盛，筆者有信心，現水平投資鋼鐵股仍有機會賺一個開。今年首季，3家鋼鐵公司的盈利都急增，鞍鋼盈利2.64億元人民幣，比前同期大升3.6倍，公司估計03年上半年盈利可增長50%；至於馬鋼，首季賺4.93億元，更大增6.4倍。重鋼未有A股上市，冇季報，但估計全年盈利有4億元人民幣，升40%，每股盈利35.6港仙，派息10港仙，以股價升上2.0元計，預測PE亦只5.6倍，息率有5厘，仍好吸引。
除鋼鐵股外，石化股亦係可兼顧之對象，有股神垂青的中石油（857）已彈出，由1.6元升上2.075元，近日調整，回落到1.87元至1.9元水平又可吸納。上海石化（338）、北京燕化（325）同儀征化纖（1033）係熱炒對象，升後調整，亦可在接近10日線水平吼住低吸。鎮海煉化（1128）係近期升幅較小者，若回落到2.5元至2.55元水平，已可上車，下一個升浪可見3字頭。
郭兆誠