恒指守住九千五，微跌2點，股份繼續個別表「演」。中石油（857）母公司同俄羅斯簽署中俄石油輸送協議，對股價冇帶來刺激。
中石油本周初最高2.075元，跟住連跌3日，昨日再唔見4仙，收1.95元，消除咗早前超買現象，相信喺1.90元邊邊，守得住然後反彈，可以開始留意收集中石油Call輪，對象係9381同9232兩件，兩件數據都好靚。9381交投活，轉身易，7月底夠鐘，現價1.75仙，溢價1.3%，槓桿率11.4倍。9232今年11月到期，現價38仙，負溢價1.8%，槓桿率5.1倍。
中銀（2388）劉總調番上去，事件好多人關注，股價由8.20元回順到8.10元，熱門Call輪9462由9.3仙跌落8.2仙，跌幅12%。人事調動，好閒啫，中銀股價若然再回落多啲，隻9462嘅值博率就大大提高，隻輪7月夠鐘，溢價係0，槓桿率9.9倍。輪價變化好易計，正股郁2%，隻輪就郁20%，都幾波動。
國泰（293）上月兩次，今個月1次，3次上到10元即回頭，昨收9.75元，跌10仙。
吼住國泰跌到9.50元以下，趁低買些少Call輪，冇得揀，得隻9810，明年4月到期，現價18.6仙，溢價10.1%，槓桿率5.2倍。
章盛