小初噚日真係嚇咗一大跳，原來太子決定重出江湖，開正名擔正大旗做東聯控股（1182）大股東，睇嚟今次魚缸又有排熱鬧。
雖然係咁，但東聯公布10合1併股，然後再1供1，供股價每股0.30元，所以噚日復牌，股價急跌25%，收0.048元。經紀陳話，東聯在完成併股之前，股價相信難有起色，但供完股之後，就唔信冇得炒作。
經紀陳又話，太子雖然在過去數年一直冇打正旗號做嘢，但唔少股份背後，都隱隱約約見到佢嘅手影，今番佢重出江湖，加上有珠寶商人背後支持，真係唔知會發生乜事。
至於東聯股價暫時表現唔多好，佢話重有一個原因，據講有個大戶手上揸住唔少貨，在未完成併股及供股攤薄佢嘅股權前，相信股價唔會有表現。
另外，福田實業（420）終於落實批股，又係大股東減持套現。福田配售代理往績唔錯，批完股後，股價相信表現硬淨。
慕容小初