𠵱家經濟環境唔好，搞到好多球會都縮皮。車路士日前就宣布，唔會同喺呢個夏天約滿嘅摩利士同埋迪高爾續約；迪高爾呢位荷蘭龍門今年成三十六歲，唔獲續約都好正常；但係摩利士重好當打，而且有啲名氣，所以我求大俠都戥佢唔抵。
早排有報道話車仔會先同摩利士續約，之後再攞佢另外加錢嚟換布力般嘅新星鄧尼；但係幾經思量後，佢哋都係決定唔要摩利士。計我求大俠話，摩利士無端端加入失業大軍嘅行列，全因為佢紀律唔好同埋𠵱家經濟環境唔好。
摩利士得嗰二十四歲，又有歐洲賽經驗，對於下屆有份踢歐冠盃嘅車仔，其實幾有用；不過，佢衰在場外紀律差，成日鬧事，搞到車仔高層對佢不滿。重有，車仔𠵱家孭幾千萬鎊債，唔可以再好似咁「有入冇出」，必須喺簽人之前先賣人。
好彩摩利士重算當打，加上有啲實力同名氣，只要唔係獅子開大口，應該可以喺新球季展開之前搵到班落。
講開經濟不景，下屆踢歐冠盃嘅法甲聯球會摩納哥，就由於負債達八千七百萬歐元（約八億港元），被勒令降班乙組；當然，摩納哥就梗係話會搵到人注資，不過𠵱家好多著名球會好似巴塞隆拿等財政都唔係好掂，要注資都未必揀摩納哥啦！
鹿島鹿角前鋒柳澤敦好有機會今夏離隊，加盟下季重返意甲嘅森多利亞，鹿島教頭施里蘇當然唔想放走呢位球員，而上季外借畀亨克嘅鈴木隆行已經回歸，總算無削弱球隊實力。施里蘇早排對球員嘅懶散態度非常不滿，佢希望借助鈴木喺歐洲比賽經驗，刺激球員鬥心。
喺禮拜六同凱沙羅頓爭德國盃嘅拜仁，賽前多咗比沙路件傷兵。拜仁前線已有薛基拿同辛達告魯斯養傷，如果連比沙路都踢唔到，就得番艾巴一個。好彩拜仁幾個中場好似波勒同史高爾都可串演前鋒，加上班中後場球員入球能力好強，所以就算比沙路唔掂，影響都唔大。
簽人高手保頓嘅領隊艾拿迪斯又出手，今次佢成功令效力奧林比高斯嘅希臘國腳中場簡拿高普路斯加盟。呢個有「希臘碧咸」之稱（唔係樣似，只係同樣咁好波）嘅二十八歲球員，到六月三十日同球會滿約後會投保頓，簽約三年。艾拿迪斯喺上年夏天已簽到奧高查等好球員，唔知簡拿高普高斯又掂唔掂呢？
據西班牙《馬卡報》報道，原來巴塞隆拿會長候選人之一嘅拉樸達同曼聯達成協議，喺六月三十日前有羅致「紅魔鬼」中場碧咸嘅優先權；如果屬實，而拉樸達又競選失敗嘅話，喺六月三十日之後咪勢必掀起一場碧咸爭奪戰？