建築邦好鍾意睇有線電視娛樂台一個節目《怒人甲乙丙》，周時叫左丁山睇。但在球季期間，左丁山一味掛住睇英超聯直播，乜都唔理，其他節目一概不知。建築邦呢日打電話嚟：「喂，英超聯踢完嘞，星期六夜晚十一點半可以睇一睇《怒人甲乙丙》，怒係憤怒個怒，唔好誤會以為『路人甲乙丙』呀！」
唔講唔知，唔係「路人」，而係「怒人」，既然星期六晚上再冇波睇，轉過娛樂台亦無妨。聽完建築邦電話，晚上食飯碰到黃毓民大噴口水，如常痛罵老人家、赤松，成個憤怒中年，真佩服佢點解一開口就咁多「怒氣」、勞氣，罵人滔滔不絕。只在馬場沙圈，先至見到佢笑口常開。鬧咁多咁耐，應該氣都冇啦！
毓民話：「喂你要睇我節目呀，我加入有線《怒人甲乙丙》，同蘇絲黃、鄺偉明（Hugo）一齊鬥怒、鬥鬧，鬧得唔知幾過癮，我就專門『丙』人『丙』事。凡事皆『丙』，如果你唔睇我嘅節目，連你都『丙』埋！」毓民做「怒人丙」，五月三十一日星期六晚上十一時半開始，未上床嘅，睇吓毓民係唔係阿丙。
毓民斥資數十萬，喺九龍城開辦「毓民牛肉麵」，因沙士襲港而放慢手腳，現在沙士漸退，世衞撤銷「旅警」，市面復甦，毓民加緊籌備，話明佢碗牛肉麵，靚到醒胃，唔捧場唔算老友喎。騎騎，毓民丙得人多，到時我哋去幫襯，假如貨不對辦，一於丙到佢暈！