集集都賣到滿堂紅嘅《WE》系列會喺8月7號再次開波，代理繼上次《WE》國際版之後，今集終於爭取到同日本同步推出，定價都係400蚊有找，唔使再捱炒價實為機迷之福，今次行貨會限量出貨，所以有興趣好去訂定先。今個星期剛推出嘅PS2遊戲《最終兵器彼女》限定版，由於碟面連遊戲封面都係限定，相對就較為搶手，市價約$680左右。
一直以嚟GBA翻版都比PS2更為明目張膽，不過7月17日推出嘅《我們的太陽》就加入咗一個光感應器，相信要做老翻都冇乜可能。遊戲由METALGEAR生父小島秀夫開發，相信絕對係7月重頭戲。
改機一向係廠商頭痛嘅問題，SONY亦用轉型號轉底板嚟打擊改機，前排日本推出嘅50000型號主機亦唔例外，相信短期內唔會有改機晶片出現，對原裝市場嚟講會係好事。前日SONY喺日本舉行的2003年度經營方針說明會中，公布咗最新遊戲主機「PSX」，呢部類似機頂盒嘅主機會以PS2作為中心，相信傳說中嘅PS3喺呢2-3年都未必會登場。