有時芬佬炒股真係好難捉，好似TCL國際（1070）咁，去年因為手機賣得而炒上2元樓上，但先前因為存貨過多及SARS事件，股價一度被質落去最低1.33元，但估唔到三扒兩撥，隻股噚日已經升番上1.79元，真係話都冇咁快。
經紀黃話，外資芬佬有時就係咁，但亦有可能係對沖基金嘅傑作，總之就前事不提，最緊要係隻股跟住點走。外資證券行陸續出報告，話TCL手機銷售非常勁抽，雖然彩電銷售方面競爭依然劇烈，但無損佢哋對於TCL目標價2元的睇法。
總而言之，芬佬鍾意點講就點講，炒家如小初之流，跟玩一轉亦無妨。
噚日最熱門嘅話題，當然係「上海首富」嘅上海地產（067）及上海商貿（1104）被質事件。雖然上海地產澄清「首富」家陣乜事都冇發生過，但經紀陳就話，沽盤全部來自中資證券行，不能掉以輕心，唔排除有大陸春江鴨收到料，因此不宜亂掂。
慕容小初