《六樓后座》導演黃真真話：「我永遠都咁青春！」青春不是外貌，有皺紋等於無青春嗎？膚淺！青春是：無憂慮、不畏懼、無包袱、不妥協、不怕瘀……夠膽講句，就是天不怕、地不怕，但絕不是一隻無腳的雀仔，依然有理想，有前途，只是玩樂放縱，就乜都做得出（犯法事絕不！）。青春是行為，一把年紀也可玩到坦蕩蕩，面子、身份，NoWay！玩要盡情，癲要瘋狂，我們才不枉青春，好似這班玩樂於六樓后座的人！
記者：梁佩芬
攝影：梁細權
六樓后座有床鋪，但無人住，只是一個竇，用來吃喝玩樂。發起人張凡，現在英國修讀電影，與肥仔阿心等十多位朋友，差不多日日都落吧劈酒，每日每人埋單至少百幾，每月計埋足夠租間屋。2001年10月，他們一起去日本旅行後，感情大進，於同年聖誕節決定搵屋，張凡二話不說，27號在油麻地找到個350呎月租三千的筍屋，28日決定落訂起竇，「六樓后座」正式成立！之後日子不用說，也是夜夜笙歌，聲大夾嘈，警察多次拍門警告，樓下阿差粗口大罵，依然故我，繼續發揮大無畏精神，有青春，怕甚麼！
后座人差不多夜夜玩樂，不用工作嗎？非也，他們有記者、創作人、文職人員。事實上，六樓后座已不只是單位號碼，更是劇團名稱。上年九月，他們有義氣為朋友頂了藝穗會一個表演期，成立「六樓后座」，首度演出《皮肉生涯原是夢》。之後，戲癮大發，決定每年要做一次舞台劇，今年十二月，即租下六樓后座兩周年，另一齣《以前拍拖好好多》登場。青春的大膽嘗試，永不放棄精神，活脫脫體現在他們身上，毫不浪費！
日日都開Party，遊戲當然多籮籮，不知何解，要激要癲，必與「性」扯上關係。由一級問三圍多少，到四級性愛Pose也有，你怕嗎？怕就唔好玩，玩得就唔怕露骨，正所謂「無事不可對人言」，做過怕你知咩，玩「Inever」就可睇你有幾真。
一係揀「誠實」講真話，好似問：「你係唔係處女？」或者揀「大膽」，經典有除衫除褲赤裸裸、與在場六、七人車輪式濕吻、當眾扮自瀆……但好似喺電影裏玩食屎就未試過！肥仔話：「有人試過賴皮玩Dare唔認數，佢夠膽搵父母條命較飛，好嘢！」有青春，都要有口齒，唔玩得，咪玩呀！
只要你有個與朋友吃喝玩樂私竇，又鍾意係竇內玩埋啲激烈遊戲，就可參加私竇大比拼，只要寄張代表你們私竇的照片，加幾行字介紹其特色，經黃真真挑選後，得獎者可獲得六月三日《六樓后座》首映戲票，截止日期六月二日。記得附上你的姓名及聯絡電話。
地址：尖沙嘴諾士佛台10號10A 星酷電影
信封註明：《私竇大比拼》