唔知係咪我求大俠有面子，早幾日噏過話梳打埠經常冇提供荷甲聯三雄嘅亞洲盤盤口，結果今日就真係有番場飛燕諾主場對洛達畀大家玩吓。不過呢場波兩隊都有隱憂，一時唔知捧邊隊好，不如信我哋吾中嘅推介啦！
飛燕諾下季幾可肯定無得踢歐冠盃，除非佢哋今晚大勝洛達十幾球，而另一邊廂阿積士又輸波啦，呢個機會真係難過中六合彩！
另外，佢哋星期日就會喺荷蘭盃決賽對烏德勒支爭標，咁即係話佢哋今場波有揸流攤留力嘅可能？
但話晒今晚係本季主場最後一戰，報答球迷踢番場好波亦好應該，加上小野伸二啱啱拎咗「亞洲足球先生」獎旺一旺佢，呢鋪真係唔知點揀好嘞！梳打埠你好嘢，我求大俠就決定一於跟睇得通透啲嘅吾中，齊齊捧上盤！
博洛尼亞會長施普連尼日前證實會留用教練古杜連。消息一出，佢哋嘅球迷會即刻發表嚴正聲明，話只要古杜連一日繼續留隊，佢哋無論喺會址、訓練場同埋球場內都會不斷柴台。呢班球迷今季試過向職球員擲臭蛋，惡名昭彰，教波教到古杜連咁，佢都算無癮咯。
維拉新帥奧拉利上任後開始有動作，首先搵番佢以前執教列斯嘅球探及教練團。𠵱家呢班人重係打緊列斯工，不過你有情時我有義，列斯都唔阻奧拉利同佢哋傾條件，隨時放得人。呢件事睇到奧拉利幾念舊，我求大俠亦希望佢可以重拾以前帶領列斯嘅光輝日子。
前晚蘇格蘭主場友賽新西蘭一比一，認真令人失望。領隊福士教咗蘇格蘭咁耐，真係冇邊次好睇過，唔知佢見隊波又一次贏唔到弱旅，有冇慚愧或諗過引咎辭職呢？我求大俠勸蘇格蘭足總千祈唔好因為佢張合約有排未完，驚要賠一筆而唔炒佢呀，長痛不如短痛啦！
噚日幾乎全世界都睇好馬刺可以喺主場食硬小馬，就連為電視台做旁述嘅巴克利同「魔術手」莊遜，都頻頻話小馬今次玩完；巴克利甚至帶住頂漁夫帽，諗住好快可以收工，跑去度假釣魚。點知小馬臨尾反敗為勝，搞到佢哋冇晒面，重畀達拉斯嘅傳媒炮轟。其實身為球賽旁述員，應該保持中立，咁鬼大細超梗係犯眾憎啦！
歐冠盃決賽前由贊助商選出一支「明星隊」，我求大俠HIGHTEA嗰陣睇到名單，差啲連啖咖啡都噴過對面！咩盧斯奧同李華度都入選？我唔否定佢哋嘅實力，但今屆佢哋有咩表現呢？難為有份評選嘅名宿卜比查爾頓重話：「個個都咁好，真係好難揀㗎！」