本月初，蘭西提過忠誠拍賣行攞到三幢舊樓嘅代理權，最後以拍賣方式出售，忠誠拍賣行投資部經理鄭世傑話，噚日全部由投資者承接。
紅磡新柳街四號，開價三百四十八萬，有五個客出價，最後以四百五十三萬成交。而土瓜灣上鄉道五號，開價二百八十萬，喺四個準買家一輪爭奪後，以三百一十五萬賣出。至於土瓜灣譚公道七十一號，開價三百一十二萬，喺五個買家角逐下，終以四百零七萬售出。三個買家都係投資者。
佢話呢三幢舊樓，每幢嘅回報率都有十厘以上，若果計埋交吉單位租金，回報就有二十厘，認真吸引。佢透露，最近又攞到幾幢舊樓嘅代理權，睇嚟啲投資客又要出動嘞。
近排拍賣市場氣氛好番好多，成交多咗，鄭世傑透露，佢公司禮拜二搞嘅拍賣會，推出二十六項物業，結果賣出十五項。
𠵱家好多商場都有形形色色嘅優惠，由現時至下個月底，喺銅鑼灣「希慎道」單一消費滿三百蚊（超市同百貨公司除外），就可以享受一連串優惠，例如三個鐘頭免費泊車、飲食優惠。若果撞啱係禮拜六日，重可以參加趣怪塗塗面、扭氣球同心意卡製作活動。另外，消費滿二千五百蚊（食肆除外），又可換領贈品。
至於「希慎道」包括嘅物業就有嘉蘭中心、利園、利舞臺廣場（圖二）、禮頓中心、興利中心、希慎道壹號、友邦中心、新寧大廈同禮頓道111號。
另外，鑽石山荷里活廣場喺六月開始，凡禮拜六同日消費二百蚊（以最多一張發票計），可以換到大排檔茶啡券；消費滿五百蚊就可以換外形趣致嘅開心報時豬。
美聯物業禮拜一至講話推出買家免佣嘅優惠，噚日傳出已經額滿，但美聯話實情係今日至開始，但就補充話優惠上限係一萬蚊，係先到先得。
美聯主席黃建業指出，今次係一次過嘅優惠，目的係希望刺激二手成交。佢重強調，唔會將啲費用轉嫁畀下面嘅前線代理，條數由公司孭，所以代理嘅佣金唔會減少，叫員工盡心盡力做。黃建業會送出五十隻紀念版時計畀做到交易嘅員工。
美記今次搞嘅單邊佣優惠，由於之前披露嘅細節唔係咁多，令市場有唔同嘅理解。有啲贊成單邊代理嘅同行，以為美記會全情投入做落去，表示支持，點知後尾至知原來係一次過，只係宣傳手法。
非典型肺炎搞亂豪宅租務市場，因好多外籍僱員撤離或者唔肯嚟香港，蘭西聽聞，一向好多日籍租客嘅紅磡海逸豪園，唔少租約要推遲簽約，有啲索性取消。
另外，有二十幾個日本家庭撤離海逸豪園返祖國，不過佢哋只係暫時離開，無退租，而且準時交租，否則業主損失慘重。
代理行見咁嘅環境，惟有改為搶本地客。中原黎堅輝話，中原上個月做到嘅成交，租務佔咗約六成，買賣只得四成左右。由於下月政府會撤銷租管，所以未來日子，租務市場應有得做，所以佢哋已經開咗個租管部門。
近排記者會多到去唔晒，好多報館都會選擇性出席。金豐鴻運跑馬地分行開張，唔知係咪公關想吸引多啲記者去，特別喺新聞稿寫明屆時會發放有關佢哋代理嘅上海浦東樓盤最新消息。
點知記者會上，田生喺現場乜都唔肯講，問乜都賣關子，下個禮拜先公布，連個樓盤名同邊間發展商都話未有資料。
跟住又話代理咗三個重慶樓盤，但田生連個盤叫咩名都唔知，又話唔方便講發展商個名，搞到大家冇料交差。
蘭西
電郵地址：
