沙士殺人，令大家正視食野味嘅危機，噚日港區人大朱幼麟急急召開「保護野生動物論壇」，請來長春社、地球之友、世界自然基金會、亞洲動物基金等多個環保團體發表偉論。
與會一眾除咗力批內地執法不力，亦集中火力炮轟港府高官。原來長春社上周四去信三司十一局同所有署長，同埋一啲成日辦野味團嘅區議員同立法會議員，要求佢哋書面承諾以身作則，唔食野味。
長春社總監張麗萍好不滿咁話，至今只有六個司、局長有書面回覆承諾，最快覆係信佛嘅梁愛詩，其餘包括梁錦松、葉劉淑儀、葉澍堃、廖秀冬同楊永強；另外有八個立法會議員同五十幾個區議員有回覆，而立會主席范徐麗泰就竟然話保持中立不表態。
張小姐最㷫嘅係馬時亨，佢叫秘書覆電話，表示只會口頭應承，但就唔會簽紙作實。張小姐質疑馬局長想講一套做一套，唔想有把柄被人捉住，否則咁簡單嘅事，為乜唔可以書面承諾？
另一個被鬧嘅高官就係衞生署署長陳馮富珍，佢竟然公開宣揚果子狸等野味嘅肉，煮熟食就好安全。此言一出，激起環保團體公憤，指摘陳太散播負面言論，連飛天朱都話會寫信投訴佢。
傳真︰2623-9278
電郵︰