美股周二大漲，投資信心旺盛，港股借勢挾淡倉，升89點，收報9510，成交接近百億元。港股暫時見唔到有比SARS更壞嘅消息出籠，唔少游資正部署出擊。傳統智慧話五窮六絕七翻身，不過阿虎有個朋友「預言」7月會有更大劑嘅事發生，真係信不信由你，最好就係衰嘅唔靈好嘅靈。
黑客繼續醉心於私有化尋寶，佢話渝港國際（613）資產淨值有17億元，現金有6億元，但市值只得3億元，計落博得過。
阿虎早前提過，有國內民營企業睇中Theme個品牌，想收購三商行（990）。果然三商行宣布獲第三者洽購股權，傳聞係中資，阿虎收嘅料確係準。現時市場游資喜歡玩工業股，成衣工業股更係首選，近期唔少成衣工業股嘅大股東及主要股東抵受唔住誘惑，紛紛向基金高價減持股權。
三商行先前債台高築，被達利國際（608）收購及重組後，去年底仍有負債1.27億元，總資產不足1億元，係1隻名副其實的負資產股份。三商行75%股權由達利國際持有，貨疏兼缺乏有心人炒作，市值只得6000-7000萬元，若此股另投一戶好人家兼獲注資，然後再引入基金作策略性投資者，肯定有游資追落後。不過，達利係咪咁易拱手讓人，則係問題。
新灃集團（1223）停牌後傳出向管理層授出5年期認購權，其實係高層張聰淵用成億銀認購4100萬股，雖則話每股作價只係2.38元，折讓幅度達23%，表面上好似好抵，但禁售期長達5年，每年只准沽20%認購股份，其實條件都幾辣。張生咁都肯制，反映對公司前景有無比信心，唔怪得新灃大折讓配股後，可以繼續炒上，噚日收報3.225元，升逾4%。
阿虎