亞視打正旗號話自己今日四十六周年台慶，咁梗係計埋麗的時代啦！咁大件事，亞視今日就喺九龍灣展貿，搞咗個百老匯式嘅歌舞表演。噚日眾演員重搞埋切燒豬拜神，祈求一切順利，而幾位亞視姐仔如田蕊妮、陳煒同江美儀都悉心打扮到場，黎思嘉重特登着低胸衫㖭！
馮寶寶就唔行性感，而以舞蹈表現自己，佢苦練funkyjazz，搞到自己同老公翁兆全都冇覺好瞓，佢話：「因為好耐冇郁，平時又唔流汗，跳完舞返屋企重好興奮，瞓唔着咪搞老公囉！唔好心邪，唔係大家諗嗰啲！」
拜神嗰陣，亞視就順便介紹埋《萬家燈火》將有演員加入，其中一個係闊別大家十八年嘅馬敏兒，佢八五年離開香港去加拿大之後，一直當家庭主婦，佢話：「試造型嘅時候先知道自己肥咗好多，監製話要我纖體，影相上鏡時會好睇好多。」
黃佩霞噚日去紅磡，出席「WeiderinJelly健康輕鬆之體驗」記者會，佢即場示範多個瑜伽動作，又大談健康心得。
黃佩霞透露七月會到東南亞，為MaggieQ任製作人嘅月曆拍健康泳衣相。佢亦忙住為兩歲半女兒搵學校，佢話：「我想幫佢報中文幼稚園，因為佢唔識中文，最衰我冇時間教，有時難得見到佢，掛住玩，貪方便又用英文溝通，佢咪唔識中文囉。」
陳法蓉同蔡少芬今個月初去蘇州，拍攝八十集電視劇《水月洞天》，佢兩個要拍到十一月先返嚟。內地SARS疫情漸受控，蘇州亦冇人受感染，但陳法蓉同蔡少芬到蘇州後亦要被隔離七日。
陳法蓉話：「其實我喺香港已經做晒檢查先出發，冇辦法啦，我哋明白當地人會緊張，我哋受隔離，佢哋會放心啲。」陳法蓉同蔡少芬同住內地嘅宿舍，重出錢請埋司機，方便開工之餘，亦方便shopping喎！
杜德偉早排去台灣拍劇《第八號當鋪》，點知因SARS關係，台灣唔畀佢入境，即使佢特登由泰國搭飛機去台灣，都要佢即刻返泰國，杜德偉喺泰國自行隔離十日之後，噚日終於去到台灣。同劇嘅拍檔林韋君同江祖平重特登送上驅霉運嘅豬腳麵線同菠蘿畀杜德偉食。
杜德偉話：「我一個人喺酒店自言自語咗八日，直到兩日前滾石先派助手嚟幫我，我一見到佢就不停同佢傾偈，助手重笑我做乜咁熱情㖭！」
林敏而同林志美噚日去醫院管理局大樓，出席「齊心行動致敬儀式」記者會。記者會主要係宣傳由林敏而作曲嘅新碟《致敬》，林敏而話：「希望翻版商放過呢隻碟，我哋只係賣四十八蚊，所有錢係捐畀抗炎基金。」事後林敏而又話：「我已經向翻版商呼籲過，如果係做慈善都再翻版，就等天收啦！」
