大市回一回氣，又再上過，恒指創出今次升市新高，報9560，收市9510，升89點，成交近100億元。不過，大市累積升幅成1200點，壓力明顯增加，好多近期累積升幅已大嘅股票，都見有人計賺錢數。其實，大市升後調整好正常，除非係有人操控或有特殊因素，否則唔會一支箭咁上，後市若向好，則調整過後，升勢會更健康。
早輪推介的3隻重生股，包括中旅（308）、南航（1055）同首都機場（694），在先後突破頭肩底的頸線阻力後，都出現可觀的升幅。另一隻亦係重生股，而走勢剛啱突破頭肩底形態阻力嘅中國民航信息（696），相信亦會照辦煮碗，急升一程。
睇番走勢，中旅突破1.05元阻力後，升上1.26元，升幅20%；南航突破1.84元後升上2.15元，升幅16.8%；首機升破1.69元後見1.93元，升幅14.2%。中航信本周先升破頭肩底頸線5.15元阻力，升上5.5元隨即出現後抽，相信一兩日內會再開車，以量度升幅計，上升目標係6.3元。
中航信主要為內地航空公司提供電子訂票服務，主要分為電子旅遊分銷（ETD）、機場旅客處理（APP）同數據網絡3大部份。非典打擊旅遊業，航空公司班次大減，中航信亦係受害者，不過，根據公司公布的數字，影響程度冇想像中咁嚴重，𠵱家非典受控，旅業逐步復甦，中航信業務亦會回復舊觀。
有危先有機，唔少基金早輪都趁機吸納重災股，呢類股份近期由低位大幅反彈。其實，中航信亦有基金垂青，近一個月來，鄧普頓基金就增持咗50萬股，而摩根大通就增持463萬股，佢哋呢個水位上車，起碼睇4至5成利潤，下半年旅業擺脫非典影響後，中航信有機會重見上市後高位7.2元。
科技行業有迹象復甦，科技股亦翻身，大有大升，細有細升，創業板的國訊國際（8128）由低位2.1仙升到近4.0仙水平。國訊主要提供網絡基建同網絡管理解決方案，中電信係主要客戶，銷售網絡覆蓋11個省市。國訊近日有人事變動，曾擔任聯想集團要職的新執董上場，相信有利公司推出切合營運商需要的產品，爭取內地市場更大佔有率。
郭兆誠