出身自百老滙嘅SarahBrightman，近年已經成功轉型為WorldMusic歌手，佢最近為咗力谷新碟，搏晒老命，早排喺SARS高峯期都重去台灣宣傳，再加上佢今次狂谷性感阿拉伯妖女嘅形象，我羅拉真係要畀個服字Sarah。
Sarah睇嚟唔係好甘心淨係搵班WorldMusicfans嘅錢，佢為咗吸納更多唔同層面嘅歌迷，於是改走性感路線。Sarah喺新碟《Harem》嘅封面上面，已經盡騷佢嘅收身成果，相信唔少男人見到佢咁正嘅身材，都會不由自主咁流口水。
喺新歌《Harem》嘅MV入面，Sarah就扮成又妖又性感嘅阿拉伯女郎，又唱又跳，重有一大班跳肚皮舞嘅性感女郎伴住，就連小朋友都要fing埋頭，真係high到震。
雖然Sarah嚟唔到香港，但唱片公司特登下個星期四喺中環KeeClub搞個免費派對，當晚會大播Sarah嘅新歌之外，重會有女郎即場大跳肚皮舞，我羅拉到時都要露番兩手狂歡吓。