世衞上星期五一宣佈解除對香港?廣東嘅旅遊警告，香港人立即湧晒出街，鬧區好不熱鬧，平時好旺嘅會所立即唔旺，因為啲高貴人客立即去晒「福臨門」諸如此類；上星期六香港冇沙士病個案，興奮咗一陣，可惜星期日又有一宗沙士病，對付沙士怪魔，還要繼續努力。
不過既然抗炎戰役，初見勝利徵兆，好唔好唔戴口罩，掉晒屋企啲口罩？左家為此辯論不休，各有意見，熱鬧過立法會辯論反董動議，卒之就係為咗小心駛得萬年船，主張戴口罩一派小勝，但左家卒之都係掉咗一半以上嘅口罩。
事關星期日嘅有線電視，播出中國嘅電視新聞，指出北京市郊嘅餐巾用紙，原料來自循環再用廢紙，呢啲廢紙令人毛骨聳然，照電視所見，抹過血有之，沾上口水鼻涕有之，黑𤷪𤷪有之，總之睇到就嘔飯，內地啲無良商人用呢啲廢紙循環，經大量漂白水漂白，喺一啲全無衞生標準嘅山寨廠包裝，套入白膠透明袋，嘜上「高級餐具紙」，送去酒樓茶室使用，問你暈未？
睇完之後，對一啲「中國製造嘅衞生用品」驚驚哋，拎晒屋企百幾個口罩存貨出嚟，睇包裝紙凡係上有簡體字寫住內地製造嘅，都拋落垃圾桶。此舉或有一竹篙打盡一船人，不過防衞沙士，乃家庭大事，總要求心安，唔好疑神疑鬼，假如家人為此而覺得戴口罩冇問題，照做可也。