今年女士們的沙灘DressCode，非三點式莫屬，只要喺周末去到最旺場的淺水灣行一轉，你會發現十居其八都是以三點式上陣。當然，除了身材標青或者樣貌出眾，一套「好掂」的三點式同樣可以吸引在場人士目光。究竟有邊款最大熱，又有邊款最養眼？今次就勞煩淺水灣各位靚女們，為大家行一場本年度沙灘版FashionShow！
記者：招佩珊 攝影：林栢鈞
逢星期一至五刊出
時間是周六早上11:00，最旺場的淺水灣雖則未見人潮，但沙灘上已見一羣又一羣男士霸晒位。嘩！戲肉到，水着們陸續進場，行勻全沙灘，發現有八成都是三點式水着，男士果然大吃冰淇淋，難怪一早擔櫈仔霸頭位。其實，剛踏入夏季時行經大大小小的泳衣店，已發現貨架上過半數都是三點式，選擇比往年多了成倍。要跟得上今年最Update的水着Look，唔該，三點式！
話就話得三塊布，其實都有好多花款，大致可分成淨色、公仔同圖案三大類，當中就以圖案成為全場最熱門之選，而Cute到暈的公仔款就好少會於靚女身上搵得到，無謂同小朋友撞款啦！當然，要扮可愛就另計。個個都着三點式，想突出就要諗諗計，而最行貨但又最有效的方法就是：一於要紅！好似Pancy、Apple、Barbie同Bonnie呢4位姐妹花，同樣是三點式，但就以Barbie的紅色最養眼。但講到最出位，當然是Apple的繩織泳衣，若隱若現，殺晒！而淨色就最穩陣，不過，除非揀鮮紅或螢光，否則，想引人注目都幾難。點解揀三點式？由靚女們親自解說。
泳衣，可以揀最搶眼的那一款，不過，喺淺水灣眾多靚女身上都總會發現一、兩件飾物，但當然唔可以戴手鏈腳鏈咁普通。至於男生，身材健碩、樣貌四正兼曬得一身古銅色，女士們當然會望多眼，不過，睇靚仔的時候，亦發現有不少紋身的BeachBoy，的確，至少可以博到我望多一眼。若然本身無真紋身，不妨買張印水紙玩吓，但小心落完水之後甩色甩到一撻撻。
玩浮床是游水以外另一個指定動作，若然你想講：「咪又係床一張，有乜特別？」那末你就大錯特錯，同泳衣一樣亦有款式可言，想做到全場最出位，可以搵棵曉浮的椰樹，若然同小朋友一齊玩，有個大大公仔就最啱使。