好快又到五月尾，距離立法會暑假休會嘅時間愈嚟愈近，政府梗係想快啲搞掂二十三條立法啦，𠵱家一個星期開八個鐘會，開嗰個難捱，聽嗰個都難頂。
好似噚日開會，講到取締組織嘅問題，何俊仁問葉劉，如果香港一個組織同內地組織「曾經產生過關係」，之後內地組織被取締，香港嘅從屬組織馬上同佢脫離關係，係咪就唔使俾港府取締呢？葉劉話最後都係要睇事實，所謂「明『燒』棧道、暗渡陳倉」，唔會咁易中啲組織計。
八方相信葉劉只係一時口快，將「明修棧道」講成「燒」，不過八方老友就「別有用心」，估計既然二十三條俾人鬧咁耐，葉劉都費事做戲，擺明燒咗你條路，理得你係民主大道定係自由之路，總之修都費事修咁話。
傳真︰2623-9278
電郵︰