新地元朗YOHOTown熱賣休閒生活概念，噚日以歎咖啡呢種休閒feel做賣點，夥拍著名咖啡連鎖店Starbucks星巴克合作，YOHOTown一期買家，每戶送Starbucks出品嘅保溫咖啡機，呢部機首度喺香港面世，市面重未有得賣。
咖啡店派咗兩位CoffeeMaster示範，一次過可以沖四杯咖啡，遲啲會喺YOHOTown搞個有關咖啡嘅講座，等住戶可以喺屋企自沖自飲慢慢歎。
新地周國賢話，希望住客即係YOHO人，可以享受新生活文化，而經過兩星期嘅宣傳，佢相信可以確立樓盤「無憂無慮」形象。繼提供女傭同送餐服務後，今次就送咖啡機，個盤距離開售相信重有一段日子，下次又唔知有乜新意思呢？
代理簽約每日都會發生，但係毋須用筆墨簽字嘅契約，就唔係時時有得睇。噚日中原續租九倉深井碧堤半島舖位，搞搞新意思。雙方代表係九龍倉助理董事黃光耀同中原地產執行董事陳永傑，用整蛋糕嘅忌廉代替墨水、蛋糕作為紙張，揮筆寫下兩人大名，作為續約簽約儀式。
中原續租間舖一年，六月一日開始起租，𠵱家裝修緊，由於係碧堤半島商場唯一店舖，九倉話租金有輕微調升，但係加幅有幾大，只有佢哋先知。別開生面嘅簽約儀式，寓意生意「步步糕升」，蛋糕最後分咗畀大家食，蘭西都有份，味道唔錯。但咁咪無咗份租約？
上個禮拜三，恒基搞港灣豪庭記者會，送咗個抗炎藥包畀一眾傳媒，點知張藥方出咗小小問題。恒基當勞張（張炳強）噚日話，藥方中生艾葉同白芷，份量應該係1.5克，而唔係15克。但緊記孕婦不宜使用。
呢張名為「避疫散」嘅藥方，由偉確投資屬下嘅偉確生物醫藥製品擁有，恒基話好多謝有關公司，公開張藥方畀市民參考，對抗疫潮。（表）
將軍澳中心早排搞咗個代理銷售比賽，其中屬於短途賽嘅「極速銷售大獎」，B組由香港置業勝出，噚日已經攞咗發展商十萬蚊支票。港置區域營業董事王品弟對蘭西講，呢個比賽為期約二十日，佢哋用咗十幾日就達到目標。王品弟透露，一半獎金由做到嘅同事分，其餘就交畀公司同埋請同事食飯。
此外，港置噚日又攞到恒基大角嘴港灣豪庭短途賽嘅組別冠軍，認真威水。
另外，利嘉閣早前發起募捐運動，幾日內籌到約三萬蚊，捐畀「護幼教育基金」，由社會福利署安排發放畀受非典型肺炎影響，失去至親嘅小朋友。
樓市隨「沙士」受控而轉好，早排一啲平價放盤，出現部份賠定再賣情況，連豪宅都有咁嘅例子。中原港島東營業董事蔡佩芳透露，跑馬地蔚雲閣中層B單位，原業主本來同買家達成協議，成交價四百二十五萬，點知張支票都未過數，有另一買家出更高價錢洽購，原業主就賠定，用四百六十萬再賣，計落重賺十三萬。
呢個單位放盤達半年，喺非典期間曾經減價，所以好快有客承接。個盤面積千一方呎，連車位。至於原業主係一手以二百七十幾萬買入。
蘭西
電郵地址：
