今年年尾就踏入不惑之年嘅畢彼特（BradPitt），原來不經不覺已經喺娛樂圈打滾咗十幾二十年。八十年代入行嘅畢仔，開頭喺電視做一啲可有可冇嘅閒角，不過自從九十年代初開始走紅之後，佢已經好少喺公仔箱出現。
早兩年畢仔曾經客串過老婆珍妮花雅麗絲頓（JenniferAniston）主演嘅《老友記》，但感覺就唔同晒喇，點都唔夠佢喺八七年客串長壽連續劇《Dallas》嗰陣咁有睇頭。
當時只得二十三、四歲嘅畢仔，飾演貓王前妻Priscilla做嘅角色Jenna個女嘅男朋友，佢嗰樣老老實實，成隻鵪鶉咁，同𠵱家完全冇得比。但畢仔當年勝在青春，唔使搞到最近話要去整容防衰老咁慘，歲月真係不留人，男女都冇得傾。
不過當年嘅畢仔唔出聲就好哋哋，一出聲就好似女仔講嘢咁雞仔聲，同近年嘅猛男形象差得遠。
唔知畢仔係咪連自己都頂唔順，自此之後佢就愈嚟愈man，兼且重成日轉新形象，早幾年以短髮為主，清爽自然，舊年為拍戲變成鬍鬚大野人，夠晒豪邁，而最近佢嘅飄逸長髮look，就流露出不羈個性。