無綫新劇《黑夜彩虹》噚日喺將軍澳保良局甲子年中學，舉行校園齊抗炎活動，演員吳啟華同女友羅泳嫻、關禮傑、黎姿、陳穎妍、鍾麗淇等都有出席。
身為女主角嘅黎姿噚日着住對三吋高嘅涼鞋出現，點知大會安排成班藝員同啲學生做體操，黎姿話好彩啲動作只係伸吓手彎吓腰啫。問黎姿對套劇嘅收視有乜嘢期望，佢話：「四十點我就着露臍裝、四十三點就低胸、四十五點就比堅尼，總之到時蔡少芬肯做乜嘢我就做乜嘢！」
而吳啟華難得同女友羅泳嫻一齊出嚟宣傳，記者要求佢兩個影合照，點知兩個都唔肯，啟華話：「唔好喇，黎姿先係女主角，今日係嚟做嘢。」羅泳嫻就好尷尬話：「唔好意思嘅！」
講開羅嘉良（撈家）向外發展，陶大宇就返無綫，啟華話：「撈家𠵱家有名氣出去搵錢都啱，大宇就靜咗啲咪返嚟囉！」
馬浚偉日前再次着上醫生袍幫紅十字會拍攝宣傳片，重去咗醫院實地拍攝。馬仔話拍攝之前做足預防措施，佢話：「入醫院之前我哋全部人都戴晒口罩，而拍攝時所用嘅血就係真嘅，我覺得咁樣比較震撼，我好明白前線醫護人員嘅工作壓力同心理負擔。」
杜德偉之前諗住由泰國轉機到台灣拍電視劇《第8號當舖》，點知最後要喺泰國自行隔離十日。連日佢喺泰國每隔三日就檢查身體一次，今日佢會由泰國飛去台灣出席劇集記者會。對於可以復工，杜德偉如釋重負，佢將會喺台灣逗留三個月，然後到上海一個月。
組合Shine繼黎明之後，成為和記產品「Net.me.Look」服務嘅代言人，噚日佢哋到海逸酒店出席記者會。當年黎明拍廣告時，有唔少靚女演員陪襯，但Shine就話：「經理人覺得兩男追一女嘅橋段太悶而否決咗，𠵱家諗緊另一個構思，或者係兩個男仔鍾意對方呢！」Shine話唔介意演同性戀，但現實就好清楚自己嘅性取向。
黃凱芹噚日同2R成員Race拍攝新歌《易愛難收》嘅MV，佢哋兩個年紀雖然相差一段距離，但合作起嚟都幾有默契。拍MV少不免會有啲親熱鏡頭，但今次一啲都冇，黃凱芹解釋話：「我哋驚唔合拍吖嘛。」
