世衞解除咗對香港嘅旅遊警告之後，市面可謂生機重現，而本地車市亦見新車接踵而來。繼勞斯萊斯低調地將新陳列室同Phantom轎車跟香港車迷見面後，又有簇新嘅右軚版福士Beetle開篷車抵埗；而亞Mark早前提及過嘅萬事得RX-8，果然響代理8月正式引入前，「人頭馬」車行經已火速運嚟新車，而且重係近期城中炙手可熱嘅X-Man變種RX-8。據亞Mark打聽得知，呢部變種RX-8除有齊全套X-Man出現過嘅改裝配件外，佢重有一套F-1嘅+/-半自動波箱，加上全車皮椅同埋High-tech嘅金屬裝飾，睇落又真係幾有瞄頭㗎！據知，車行為協助刺激香港經濟，僅有10部配額嘅變種RX-8，車價會由原來44萬9千大減5萬蚊，家陣預定售價只係39萬9千咋！
若然大家想近距離睇吓部車的話，明日（5月29日）中午，「人頭馬」車行會響九龍陳列室搞個大型發布會，聽聞重係一次別出心裁嘅變種RX-8預展㗎！