自從有消息話有多過兩個局長新聞秘書申請咗食「瘦鴿餐」，八方即刻周圍問，究竟邊個局長咁難頂，邊個咁快頂唔順。
答案梗係唔知啦。因為正如班秘書話齋，申請咗未必一定批㗎嘛，俾人知道咗有乜好呢？唯一可以肯定啲講嘅係王永平嘅新聞秘書潘樹泰冇得申請，因為佢已經夠鐘退，至於重差五年先夠鐘嘅，就各自盤算。
何志平嘅新秘謝祥興話做得好happy，所以冇申請。當然有時唔係高唔高興嘅問題，𠵱家嘅安排，實在有啲唔妥，雖然話總新聞主任（即新聞秘書）要全方位，乜都掂，但係佢哋始終唔係政治任命，要佢哋二十四小時候命，日日跟出跟入，又要做保鑣，又要做顧問，重要做埋跑腿文膽，你估係超人咩？
話就話有成組新聞主任支援，但係坐喺不同辦公室，真係遠水不能救近火，就算佢哋唔申請提早退休，新聞處長蔡瑩璧都應檢討檢討啦。
傳真︰2623-9278
電郵︰