余文樂長得高頭大馬，故很難想像他童年時曾被黑唐狗惡噬，自此黑狗更成為他的剋星。阿樂自幼在男仔堆中長大，雖然與兄長偶有吵鬧兼打架，但兩兄弟仍合力做管家，同心照顧妹妹。
余文樂小時對小動物情有獨鍾，每見貓狗必會逗玩一番，但一次被狗咬的慘痛經歷，令他留下童年陰影。
阿樂日前在電話說：「我細個嘅時候，養咗幾隻貓同幾隻狗，本來我好鍾意小動物，但有一次我撩隻黑色唐狗玩，玩玩吓佢突然一啖咬落我隻手臂度，即刻流血啦，後尾我重要去打防瘋狗針。嗰次之後，我見親啲大狗都好驚，尤其係啲黑色嘅唐狗，𠵱家都有陰影。」
阿樂的父母因從商的關係經常出國，故將阿樂交由姨媽照顧，有時阿樂又會到居於澳門的爺爺家中耍樂。而阿樂的母親有許多兄弟姊妹，故他自小與兄長及表哥表弟的感情特別好，但湊在男仔堆中，打架亦少不免會發生。
阿樂最記得當年曾與兄長打到「爆缸」，他說：「我阿哥大我五年，我次次都唔夠佢打嘅，有次同阿哥打交，我唔知點樣撞埋枱角，撞穿咗個頭，流晒血，嚇到阿哥呆咗，不過第日大家已經唔記得，又攬頭攬頸一齊玩。」
阿樂共三兄弟妹，他排第二，父母給他們取名為康、樂、棋，他笑說：「阿爸阿媽以前都冇諗過會生阿妹，生我同阿哥嗰陣時，只係諗住希望我哋健康快樂，所以就改咗呢個名，同康樂棋冇關。」
阿樂與兄長對妹妹非常愛錫，兩兄弟有如做管家般看緊妹妹，他說：「細妹𠵱家重讀緊中學咋，佢性格比較怕醜，又細個，除咗阿媽之外，我哋都有睇住佢，冇乜事都唔畀佢出夜街，我哋𠵱家唔畀佢拍拖㗎，好彩細妹都好乖。」
採訪：朱芷瑩
