打電話畀太子黃，發覺接電話嘅秘書聲音，甚為生疏，唔係聽咗幾年嘅聲音噃。太子黃接咗電話之後，問左丁山：「係唔係有好貼士，快啲講！」左丁山答：「貼士即係山埃，講慢啲都唔遲，首先問吓，你位秘書換咗人咩？」太子黃話：「炒咗咯，佢恃熟賣熟，代我作主，推咗一啲約會都唔話畀我聽，搞到好多人唱我大牌沙塵，所以炒咗佢！」
詳細了解情況之後，知道太子黃本來好錫位舊秘書，跟他六年，知情識趣，話頭醒尾，亦知道晒佢嘅心意、偏好。但弊在知得太多後，自行作主，截咗好多電話唔畀太子黃聽，亦同佢推咗唔少約會，一啲下屬亦見唔到太子黃。太子黃喺酒會、飯局中，偶遇到俾佢秘書「頂位」嘅人，俾人唱餐懵，於是諗咗一輪，決定將秘書炒魷。
左丁山問：「既然秘書知你心意，有乜唔啱？」太子黃話：「佢截住嗰啲人，確係十個之中，有九個係我唔喜歡嘅，但係唔見佢哋，係我揸主意嘅，佢唔可以唔話畀我聽，就踢走嗰班我唔鍾意嘅人。如果俾佢搞落去，我咪變成歷史上嘅昏君，俾宦官把持，損失咗一啲偶然機會都唔知！」
太子黃好似熟讀張建雄《管治篇》，發揮帝皇CEO本色，炒咗跟佢六年嘅得力秘書，好有決斷力，資深秘書，可引為鑑。