立法會多咗直選議員後，俾人譏為「高級區議會」，估唔到連捉曱甴都會喺議事堂內引起辯論。
民建聯楊耀忠今日會提出動議辯論，要求政府號召各行各業搞衞生，民主黨李華明提出三點修訂，包括罰隨地吐痰者做社會服務，解決公屋居民執到滿屋垃圾嘅問題。而最特別嘅一項要求，竟然係要政府發起全港滅曱甴運動。
原來𠵱家負責滅鼠、滅蚊同滅蟲嘅食物環境衞生署，工作唔包括滅曱甴，沙士肆虐，曱甴被懷疑係傳播病毒疑兇之一。所以民主黨就將呢個曱甴問題擺上議事堂。食環署發言人解釋，由於市面上各式各樣嘅殺蟲水、曱甴屋、曱甴藥等，對滅曱甴好有效，而且購買使用方便，市民輕易就可搞掂屋企嘅曱甴問題，唔使政府勞師動眾去滅曱甴，所以一直冇搞滅曱甴運動。不過如果市民要求，該署都願意上門服務，但要收番錢，金額視乎單位面積而定，但係實在太少滅曱甴「柯打」，實際收幾多錢連發言人都唔係幾清楚。
其實李華明今次提嘅修訂好合時宜，因為當局噚日宣稱，從沙田瀝源邨榮瑞樓早前抽取嘅樣本發現有沙士病毒殘餘基因。嘩！唔通就係楊永強局長成日講環境因素