即將退休的滙豐（005）行政總裁韋志誠寄語港人，香港終會恢復活力，比前更上一層樓。阿虎都希望滙豐大班所言非虛。滙豐業務遍布全球，經濟觸覺當然比阿虎強得多。不過，香港至今經濟難以復甦是因為樓價下跌及失業率高升，導致港人有錢唔敢使，任由港府使幾多錢、出幾多招都難以刺激本地消費，要增加市民信心，首要保住市民飯碗，兼且要讓市民對份工有安全感，可惜連政府都要減人手，滙豐及電盈（008）等大機構唔係將後勤中心北移，就係想盡辦法裁員，打工仔由98年至今都未安樂過。
港股噚日回吐71點，收報9420，投資者借QDII傳聞出貨，加上中石油（857）又傳出有策略性投資者出貨，搞到石油股遭拋售，中石油跌2.7%；中石化（386）挫3%；中海油（883）更急挫4.3%。
配股浪潮真係陸續有來，噚日又傳德永佳（321）大股東想配股，減持6600萬股，每股5.90元。據聞今次大股東減持主要是因為有基金想要貨，所以配售之後，估計只會略為調整，整體升勢可持續。
太平協和（438）宣布私有化定價每股0.65元，較每股資產淨值2.188元，大幅折讓70%，折讓幅度如此大，實在令人懷疑大股東提出私有化計劃的「誠意」。受私有化消息刺激，對沖基金隨即入市炒高太協，股價大升42%，收報0.61元，成交大增至6348萬元。
對沖基金玩呢類尋寶遊戲，主要計算私有化成功機會率，若成功機會大，就會以低於收購價水平入市大手吸納，賺取差價。一旦覺得私有化可能失敗，就會不計價沽貨，所以跟風炒賣，要識得落車。
阿虎