又有一間公司搞私有化，太平協和（438）受私有化消息刺激，股價急升42%，收0.61元。雖然太協股價同資產淨值大折讓，但小初同一班老友，至今都唔明佢哋嘅動機，皆因呢隻股久唔久就炒一轉，成班幕後人如天下第一莊等，一向玩得好高興，私有化之後，佢哋又搵乜嘢玩呢？
基於工業股炒近尾聲，加上太協搞私有化，小初收市後約班老友飲茶，順便研究重有冇私有化寶藏。席上有人品題漢國置業（160），理由亦係同太協咁上下，但小初覺得可能性唔大，反而似係供完股之後有人想抽高散貨。
漢國早排先至10合1併股，同埋完成2供1供股計劃。先排個市咁差，漢國又係地產股，冇乜人肯供股係意料中事，最後只獲63.34%供股，阿媽建業實業（216）持股量，就由47.39%增至69.39%。
漢國噚日升8.77%，收1.24元。如果成交再大啲，有份供股嘅幕後炒家，相信好快就會成功出晒貨。
慕容小初