所謂「吃不到的葡萄是酸的」，今屆歐冠盃決賽雖然喺英國打，但係爭盃嘅兩支係意大利球隊，所以英國傳媒只係低調處理。
記得英格蘭舊年喺世界盃八強俾巴西踢出局後，英國啲傳媒當世界盃經已玩完咁款。雖然祖記同AC今晚喺曼聯嗰奧脫福爭歐冠盃，但英國傳媒照樣唔畀面，係咁倚報道吓就算數，唔好似之前曼聯對皇馬或祖記咁，大做特做。
英國著名體育網站《Sporting-life》更話呢場波難賭，勸球迷唔好買（nobet）。你知啦，好多人有買波先會睇波，𠵱家《Sporting-life》咁做，好似幫歐洲足協倒米。唔怪得歐洲足協猛喺佢哋嘅官方網頁做宣傳，重搵埋一班名球員同教練嚟賽前論戰啦！
其實唔單止英國，連香港都冇乜大戰氣氛；香港球迷好多都鍾意睇英超聯同西甲聯，意甲雙雄踢決賽，好多人唔係太啱口味。話時話，如果祖記同AC今晚可以踢場好波，話唔埋可以幫意甲聯拉番啲客。
隨住法甲勒阿弗爾降落乙組，英超利物浦多咗兩名「猛將」。事緣領隊侯利亞喺○一年夏天用六百萬鎊簽咗兩個十八歲法國仔勒泰力同普高尼，借咗畀勒阿弗爾，但勒阿弗爾降班，侯利亞於是收番，重猛話佢哋勁。我求大俠覺得如果佢哋真係咁勁，勒阿弗爾就唔使降班啦！
恩浩雲能否奪今屆荷甲組錦標，就要睇禮拜四作客高寧根嘅煞科戰，雖然和波已經搞掂，但教練軒迪克唔想臨尾香，勒令唔畀兩個南韓愛將朴智星同李榮杓返祖家備戰對日本友賽，全力爭標，證明今季搵南韓愛將係正確。如果我係佢哋，都想留隊攞番個聯賽錦標威吓！
早排一身同性戀打扮嘅加斯居尼，最近又傳佢會離開甘肅天馬，轉去中東阿聯酋搵食，順便避開「沙士」。甘肅天馬就話雙方合約到十一月先屆滿，「加薩」離隊應要畀轉會費。不過，天馬官員承認，中東球會財力雄厚，如果佢哋肯畀錢，都好難挽留佢囉。
愛之深，恨之切，我求大俠想講嘅係前哥倫比亞國腳艾斯派拿，對佢效力嘅一支智利球隊嘅情操。佢老哥最近見隊友態度散漫，就拎支槍出嚟「砰砰」兩響，希望警醒班後輩認真啲！佢真係用心良苦，不過練波練到出埋槍，就真係誇張咗嘞！
噚日朝威爾斯就同美國踢咗場友賽，結果輸○比二，十場不敗紀錄終告一段落，我哋名家吾中一早提晒大家要吼實上盤，亦講明威隊只係半力出擊，冇負大家寄望啦！我求大俠就覺得呢個同時係佢哋領隊曉士嘅部署，寧願𠵱家喺友賽「斷纜」輸波，減減球員壓力，轉頭喺歐洲國家盃外圍賽再贏過重好啦！