古天樂天生一副明星相，原來是遺傳了明星爸爸的血統，古父年輕時曾是粵語片明星，只可惜星運不濟，未能盡展所長，幸而兒子彌補了他的遺憾，成為當今影壇紅星。
看過古天樂父母的陳年舊照後，方知原來古仔的雙親年輕時長得很俊秀，難怪他們的愛情結晶品也是英俊瀟灑。
不講不知，原來古仔爹哋以前也是粵語片明星，藝名叫高峰，曾經與吳君如父親夏春秋、張英才、司馬華龍、已故的鄧寄塵等藝人合作拍戲，雖然古父長得英俊不凡，熱愛演戲，只可惜星運還是差了一點兒。
對於古爸爸來說，無法在藝壇盡展所長的確有點遺憾，幸而他的長子古仔為他爭回一口氣，在當今影壇成為一線紅星。
古仔日前接受電話訪問時說：「細個有一個明星爸爸，其實感覺冇乜特別，基本上爹哋同媽咪好錫我同細佬，佢哋一得閒就帶我同細佬去旅行，而每次去到郊外，我哋一家人會影好多相，次次見爹哋攬住媽咪影相，媽咪都甜絲絲，我就覺得佢哋好恩愛。」
在十二歲時已經有七百幾度近視的古仔，長大後他才改戴隱形眼鏡至今，古仔笑說：「細個淨係玩，乜煩惱都冇，真係要感激爹哋同媽咪帶咗一個愉快嘅童年畀我，不過童年時都有啲唔係咁好嘅回憶，喺我兩、三歲時，因為生得肥肥白白，啲大人鍾意好肉緊咁搣我塊面，真係好討厭。」
採訪：陳月媚
