一如所料，世衞解除香港旅遊警告後，本港的航空、酒店及旅遊股都急升，其中國泰（293）升4.7%，南航（1055）同東航（670）更分別大升8-10%，中旅（308）升近9%，香格里拉（069）亦升逾5%。
市場同時傳中國證監會好快批准QDII，搞到中資股全部起哄，其中馬鋼（323）追落後，勁升10.7%，收0.93元，成交達1.55億元；中石油（857）升6%，收2.025元，成交3.69億元。據聞中石油高層會隨胡主席去俄羅斯，將會簽訂合約。
阿虎問黑客係咪真係有中資流入？黑客仍然係個句，並無錢流入，只是資金輪流搵嘢炒。至於QDII係咪真係搞得掂，好多中資證券行都話無聽過，其實QDII落實與否，只有心理刺激，因為中資要流入，重有大把渠道，根本唔使等QDII。
三商行（990）急升45%後停牌，話會公布股價敏感消息，有傳聞大股東達利（608）可能出售三商行，買家是國內一間民營企業，聽講大陸買家主要是睇中Theme呢個品牌。Cookie話，早前一直有傳聞話有間民企會入股香港成衣股，唔通就係呢一單？
南順香港（411）噚日又出現3宗大手成交上板，合共850萬股，每股2.65元，成交金額2253萬元。
早前大股東斥資4128萬元，向獨立第三者購入1794.9萬股南順香港，已經令人懷疑大股東會否將南順香港私有化，呢次唔知係咪又係大股東增持？此股噚日無乜點升，收2.725元，升1.9%。不過，睇嚟就快有動作跟尾。
阿虎